ENRC-diń quramyna kiretin «Qazhrom» TUK» AQ-tyń fılıaly Aqtóbe ferroqorytpa zaýytynda jergilikti buqaralyq aqparat quraldary ókilderi úshin qorshaǵan ortany qorǵaý saıasaty boıynsha ashyq esik kúni ótkizildi. Olar №1, №2 balqytý sehtarynda jáne gazdan tazartý ýchaskelerin aralap qorshaǵan ortany qorǵaý talaptarynyń oryndalý barysymen tanysty.
Bul is-sharanyń negizgi maqsaty buqaralyq aqparat quraldary ókilderin kásiporyndaǵy óndiris jumystarymen jaqynyraq tanystyrý jáne olardy tolǵandyryp júrgen ekologııalyq máseleler jóninde týyndaǵan saýaldarǵa tolyq jaýap berý bolyp tabylady. Aldymen jýrnalıster ádettegideı qaýipsizdik tehnıkasyna baılanysty óndiris aımaǵynda júrip-turý jaıynda nusqaýlyqpen tanystyryldy jáne arnaıy kıimdermen qamtamasyz etildi.
Sharaǵa qatysýshylardy alyp júrgen zaýyttyń bas ınjeneri Leonıd Prokopev №1, №2 balqytý sehtarynyń búgingi tynys-tirshiligi, shyǵaratyn ónimi, sapasyna toqtalyp, óndiris prosesin kórsetti. Al qonaqtardyń kásiporynnyń ekologııalyq saıasatyna qatysty suraqtaryna «Qazhrom» TUK» AQ-tyń ekologııany josparlaý jáne retteý departamentiniń bastyǵy Svetlana Mashenko, tehnologııalyq prosesterge baılanysty suraqtarǵa zaýyttyń bas ınjeneri Leonıd Prokopev jaýap berdi. Sodan keıin gazdan tazartý ýchaskesiniń bastyǵy Erbol Mahambetov ýchaskeniń jumys barysymen tanystyrdy.
«Kásiporynda mundaı ashyq esik kúnin alǵash ret uıymdastyryp otyrmyz. Búgin mine, óndiriske, ekologııaǵa qatysty kóptegen suraqtarǵa bilikti mamandar tolyqqandy jaýap berdi. Zaýyttyń tynys-tirshiligimen, shyǵaratyn ónimi, sapasy, ekologııalyq saıasaty jaıynda málimetterge qanyq boldyńyzdar, aralap kórdińizder. Aldaǵy ýaqytta bul bastama óz jalǵasyn tabady degen senimdemin», dedi «Qazhrom» TUK» AQ-tyń baspasóz qyzmetiniń jetekshisi Inessa Fadeeva.
Satybaldy SÁÝIRBAI,
«Egemen Qazaqstan».
Aqtóbe oblysy.