Elordadaǵy Beıbitshilik jáne kelisim saraıynda sýretshilerimizdiń tańdamaly týyndylarynan turatyn bes tomdyq «Qazaq óneri» atty kitabynyń tusaýkeseri men beıneleý óneri sheberleriniń shyǵarmashylyq kórmesi ótti.
«Qazaqstan Sýretshiler odaǵynyń 80 jyldyq mereıtoıy atalyp ótken bolatyn. Soǵan baılanysty mádenı is-sharalar baǵdarlamasy aıasynda «Qazaq óneri» atty jınaqty shyǵarǵan edik. Bul kitap bes tomnan turady. Birinshi tomy «Ejelgi dáýir» atalsa, «Halyqtyq jáne qoldanbaly sándik óner», «Músin monýmentaldy sándik óner», «Keskindeme» jáne «Grafıka» bolyp jalǵasady. Atalǵan jınaqqa belgili tarıhshylar, ónertanýshylar, ádebıetshiler men sýretshiler, mádenıet jáne óner qaıratkerleri týyndylarynyń basyn qosyp, irgeli eńbekti búgin halyqqa usynyp otyrmyz», – dedi Astana qalasy Sýretshiler odaǵynyń basqarma tóraǵasy, Qazaqstannyń eńbek sińirgen qaıratkeri Qońyr Muhamedıev. Sondaı-aq, ol bul jınaqtyń, ásirese, joǵary oqý oryndarynda bilim alyp jatqan stýdent qaýymy men izdenýshilerge tıgizer paıdasy molynan ekenin de nazardan tys qaldyrmady. Jınaqtaǵy ónertaný maqalalary qazaq, orys, aǵylshyn tilderinde oqyrmanǵa usynylyp otyrǵanyn da tilge tıek etti.
Tusaýkeserge arnaıy kelgen belgili ǵalym Ǵarıfolla Esim bul kórmeden alǵan áseriniń erekshe ekenin atap aıtty. «Men sýretshiler qaýymyn óte jaqsy kóremin. Sebebi, kezinde on bir jyl kórkemsýret fakýltetinde dekan bolǵanmyn. Jalpy, sýretshiler bala minezdi, pák jandar. Bir sózben aıtqanda, bala minezdi eresek adamdar. Nege bala minezdi bolady? О́ıtkeni, bular tabıǵatqa, qoǵamǵa, adamǵa sol balalyq taza kóńilmen qaraıdy da, sol taza kóńilderin ózderiniń shyǵarmalarynda boıaý tilimen sóıletedi. Bir mysal, Marat Toqseıitovtiń «Alań», «Keshtiń túsýi» atty jumystary qandaı keremet! Aýyldyń beınesin ádemi kórsetken. Osyndaı talanttar kóbeıe bergeı», – deıdi fılosof.
Ábdirahman QYDYRBEK,
«Egemen Qazaqstan».
––––––––––––––––––––––
Sýretterdi túsirgen
Erlan OMAROV.