Túrkııanyń Densaýlyq saqtaý mınıstrligi shuǵyl qoldanýǵa arnalǵan ınaktıvti Turkovac vaksınasyn maquldaýǵa ótinish berdi, dep habarlaıdy Egemen.kz.
Túrkııanyń Densaýlyq saqtaý mınıstri Fahrettın Koja Turkovac boıynsha jumys aıaqtalýǵa jaqyn ekenin aıtty.
«Men jaqsy jańalyqty bóliskim keledi: COVID-19-ǵa qarsy otandyq Turkovac vaksınasy shuǵyl paıdalanýǵa ruqsat alýǵa ótinish berdi», dedi Koja.
Onyń aıtýynsha, mınıstrlik Túrkııanyń dári-dármek jáne medısınalyq maqsattaǵy buıymdar jónindegi resmı agenttigine (TITCK) júgingen. Túrkııa bıligi bul vaksınany 2021 jyldyń aıaǵyna deıin koronavırýspen kúresý úshin búkil álemde qoldanýǵa bolady dep úmittenedi.
Turkovac vaksınasyn Erdjııas ýnıversıtetiniń ǵalymdary Túrkııa Densaýlyq saqtaý mınıstrligine qarasty Túrkııanyń Densaýlyq saqtaý basqarmasymen (TÜSEB) birlesip jasaǵan. Klınıkalyq synaqtardyń úshinshi kezeńi aıaqtalýǵa jaqyn.
Buǵan deıin Túrkııa óz jobasy boıynsha koronavırýsqa qarsy vaksınasynyń birinshi jáne ekinshi fazasyn synaqtan sátti ótkizgen bolatyn. Úshinshi kezeń sátti aıaqtalsa, vaksınany jappaı óndiriske jáne paıdalanýǵa engizý josparlanǵan.