Somalıde Birikken Ulttar Uıymynyń Qaýipsizdik kóliginiń (konvoıynyń) jarylýy saldarynan kem degende 8 adam qaza taýyp, 17 adam jaraqat aldy.
«Ash-Shabab» qarýly toby Mogadıshony dúr silkindirgen kólik jarylysyna qatysty jaýapkershilikti óz moınyna aldy. Kýágerlerdiń aıtýynsha, oqıǵa ornynda oq atylǵan.
Somalı polısııasynyń ókili Abdıfat Aden Hassan jýrnalısterge ázirge 8 adamnyń qaza tapqany anyqtalǵanyn habarlady. Onyń aıtýynsha, jaraqattanǵandar men qaza tapqandardyń sany artýy múmkin. Sonymen qatar ol jarylǵysh zattarmen toltyrylǵan jol talǵamaıtyn kóliktegi terrorshynyń BUU Qaýipsizdik konvoıyn nysanaǵa alǵanyn málimdedi.
Jedel járdem qyzmeti jarylys saldarynan zardap shekken 23 adamdy evakýasııalady. BAQ-tyń habarlaýynsha, halyqaralyq uıym kóligi mektep janynan ótip bara jatqan. Kólikte BUU-nyń qyzmetkeri bolǵany ne bolmaǵany ázirge belgisiz.
BUU sheneýnikteri túsinikteme berý týraly suraýlarǵa birden jaýap bergen joq.
«Ash-Shabab» tobynyń áskerı operasııalar jónindegi ókili Abdıasıs Ábý Mýsab shabýyldy osy toptyń sodyrlary jasaǵanyn rastady.
Mogadısho ortalyǵynda oryn alǵan jarylystyń qatty bolǵany sonsha, jaqyn mańdaǵy mekteptiń qabyrǵalary qulap qalǵan. Kóshedegi ondaǵan kólikke zaqym kelgen. Kelesi kóshedegi aýrýhana da kúl-talqan bolǵan. Mekeme qyzmetkeri Muhammed Hýseın ózin qutqarýshylardyń qulaǵan shatyrdyń astynan alyp shyqqanyn aıtady.
«Bizdiń aýrýhana jermen jeksen boldy. Mekeme janyndaǵy mekteptiń de qabyrǵasy túgeldeı qulady. Mundaı oqıǵada 8 ǵana adamnyń ólýi múmkin emes. Japa shekkender sany kóp dep oılaımyn. Aldymen jarylys boldy da, keıin oq atyldy», dedi kýáger.
«Ash-Shabab» – uzaq jyldar boıy Somalıdiń ortalyq úkimetimen kúresip kele jatqan top. Qarýly top ıslam dininiń zańdaryn úkimet júıesine engizýdi kózdeıdi. Mundaı terrorıstik shabýyldar atalǵan toptyń alǵashqy áreketi emes.