Eki myń jyldan astam tarıhy bar kóne Taraz qalasynyń búgingi kelbeti men shahardaǵy sáýlettik ózgerister kóptiń kóz aldynda. Ásirese táýelsizdik jyldary Tarazdyń túrlený kezeńi boldy. Kóne qalanyń órnegi artyp, órisi keńeıdi.
Tarıhı shahardyń búgingi kelbetin kópshilikke tanytý maqsatynda Táýelsizdiktiń 30 jyldyǵyna oraı, qala ákimdiginiń qoldaýymen «Túrlengen Taraz» respýblıkalyq foto-beıne, mobılıografııa sheberleriniń baıqaýy uıymdastyrylǵan bolatyn. Shahardyń barlyq bolmysyn bir ǵana nysanaǵa syıdyrǵan sheberler baıqaýǵa «Úzdik mobılıograf», «Úzdik dron túsirýshi», «Úzdik fotograf», «Úzdik sılýet», «Ushpaly sýret» sııaqty 15 atalym boıynsha qatysqan.
Oblystyq tarıhı-ólketaný mýzeıinde atalǵan baıqaýdyń jeńimpazdaryn marapattaý rásimi ótti. Jalpy, baıqaýǵa qatysqan 46 adamnyń ishinen 15 úmitker oza shaýyp, atalǵan ár atalym boıynsha jeńimpaz atandy. Qatysýshylardyń árqaısysy kún sanap kórkeıip kele jatqan Taraz qalasynyń búgingi keskin-kelbetin jan-jaqty dúnıeleri arqyly barynsha áserli etip kórsete bilgen. Nysanaǵa, ásirese, kóne shahardyń tarıhı-mádenı oryndary kóp ilingen. Sonymen qatar keıingi kezderi memleket qoldaýynyń nátıjesinde boı kótergen nysandar da nazardan tys qalmapty. Baıqaýdy uıymdastyrýshylardyń aıtýynsha, barlyq qatysýshy úmitker ózindik qoltańbasymen, oılaý ereksheligimen jáne kóre bilý qabiletimen tarıhı shahardy tanytýǵa atsalysqan. Jeńimpazdar men júldegerlerdi qala ákimi Erjan Jylqybaev marapattap, olarǵa shyǵarmashylyq tabys tiledi.
Jambyl oblysy