Jaqynda Qordaı shekara otrıadyna qarasty «Sortóbe» zastavasynyń jasaǵy qazaq-qyrǵyz shekarasy arqyly jylqylardyń ótkenin baıqady. Naqtyraq aıtqanda, áskerı kezekshilik kezinde qazaqstandyq sarbazdar shekaradaǵy ınjenerlik qorshaýdyń buzylǵandyǵyn, sol arqyly birneshe jylqynyń kórshi elden beri qaraı ótken izderin anyqtady.
Shuǵyl túrde iz kesý jumystary uıymdastyryldy, nátıjesinde álgi izder Qarakemer aýylyndaǵy mal soıatyn orynǵa alyp keldi. Iz boıynsha sanaǵanda jylqylardyń 15 bas ekendigi anyqtaldy. Alaıda, maldy qaıtarý kezinde jergilikti turǵyndar (100 shaqty adam) qarsylyq kórsetip, jylqylardy soıa bastady. Quqyq qorǵaý organdaryna habar beriledi. Atalǵan orynǵa Qordaı aýdanynyń prokýrory keledi.
Istiń aq-qarasyn anyqtaý úshin Shekara qyzmeti ortalyq apparatynyń, prokýratýranyń ókilderi, Qarakemer aýylynyń ákimi jáne ózderin maldyń ıesi sanaıtyn adamdarmen birge ákimdikke kelip, mal esebin júrgizetin kitapty tekserdi, al onda 2013-2014 jyldary tipti eshqandaı mal tirkelmegen bolyp shyqty. Tekserý barysynda veterınarııa ókili jalǵan anyqtama bergendigi, tirkeý jumystary mal ıeleriniń qujattarynsyz atústi júrgizilgendigi anyqtaldy.
Tekserý nátıjesinde, aman qalǵan 7 bas jylqyny «Qarakemer» komendatýrasyna áketýge sheshim qabyldandy. Atalǵan derek boıynsha tergeý amaldary júrgizilýde.
«Egemen-aqparat».