Fýtboldan Qazaqstan kýbogy jolyndaǵy jarystyń fınalynda Almatynyń «Qaıraty» Qaraǵandynyń «Shahterin» jeńip, óz tarıhynda atalǵan júldeni onynshy márte jeńip aldy. Elordadaǵy «Astana Arenada» ótken tartysty básekeniń negizgi jáne qosymsha taımy 3:3 esebimen teń aıaqtalyp, match penaltı serııasyna ulasty. 11 metrlik núktede dáldik tanytqan «Qaırat» fýtbolshylary jeńimpaz atandy.
Qazaqstan chempıonatyna qaraǵanda, kýbok jolyndaǵy jarystarda táýir nátıjege qol jetkizip júrgen «Qaırat» match aldynda bul básekeniń aıqyn favorıti edi. О́ıtkeni Almatynyń ujymy Qazaqstan kýbogynyń fınalyna 12 márte shyǵyp, onyń toǵyzynda jeńimpaz atanǵan bolsa, «Shahter» kýbok fınalyna úsh márte shyǵyp, tek bireýinde ǵana kýbokty basynan asyra kótergen. Biraq bul jolǵy fınalda «Shahterdiń» jeńiske jetýge degen qulshynysy zor boldy. Sebebi «kenshiler» ujymy úshin bul matchta Qazaqstan kýbogy júldesi ǵana emes, kelesi jylǵy Eýrokýbok básekesiniń joldamasy da sarapqa salynǵan edi.
«Qaırattyń» da ózindik motıvasııasy boldy. Bul match klýbtyń brazılııalyq surmergeni Vagner Lavtyń «Qaırat» sapyndaǵy sońǵy resmı kezdesýi edi. Ortalyq stadıondaǵy Konferensııa lıgasynyń kezekti týr oıynynda jeńiske jete almaǵan soń, áriptesteri kýbok jolyndaǵy básekede qýantýdy kózdegen edi.
«Astana Arenaǵa» jınalǵan jankúıerler oıynnyń negizgi ýaqytynda eki túrli taımnyń kýási boldy. Matchtyń birinshi bólimi «Qaırat» fýtbolshylarynyń basymdyǵymen ótti. Anyǵyn aıtqanda, alǵashqy 45 mınýt Vagner Lavtyń benefısine aınaldy. Brazılııalyq sańlaq kezdesýdiń nebári 6-mınýtynda matchtyń esebin ashsa, 40-mınýtta Rıkardý Alveshtiń buryshtamadan asyrǵan pasy aldymen qaqpa baǵanyna tıip, keıin Vagnerdiń aıaǵyna dóp keldi. Al brazılııalyq shabýylshy ashyq qaqpany kózdeýde esh qatelesken joq. Osylaısha, «Qaırat» birinshi taımda Lavtyń dýbli arqasynda 2:0 esebimen jeńiske jaqyndaı túsken edi.
Kezdesýdiń ekinshi bóliginde Magomed Adıev shákirtteri namysqa tyrysyp, elimizdiń úzdik klýbtarynyń birine qarsy tegeýrindi oıyn kórsetti. Matchtyń 47-mınýtynda Mıhaıl Gabyshev Stas Pokatılov qorǵaǵan qaqpadan sańlaý taýyp, esep aıyrmasyn qysqartty. Al matchtyń aıaqtalýyna 15 mınýt qalǵanda Martın Toshev áriptesi Vladımır Hozınniń áýelete asyrǵan pasyna birinshi jetip, baspen tamasha gol soqty – 2:2. Mine, osyndaı teke-tirespen ótken matchtyń sońyna deıin osy esep saqtalyp qaldy.
Negizgi ýaqyt teń aıaqtalǵan soń match qosymsha ekstra-taımǵa ulasty. 30 mınýtqa jalǵasqan overtaım da 1:1 esebimen teń aıaqtaldy. 97-mınýtta Aıdos Táttibaev 11 metrlik aıyp dobyn sátti oryndasa, 110-mınýtta Artýr Shýshenachev tarazy basyn qaıta teńestirdi.
Penaltı serııasynda almatylyq ujym myqtylyq tanytyp, 9:8 esebimen jeńiske jetti. «Qaırat» sapynan sheshýshi on bir metrlik dopty Kamo Oganesıan soqty. Osylaısha, almatylyq klýb óz tarıhynda 10-márte Qazaqstan kýbogyn ıelendi.
Al kýboktan qur qalǵan «Shahter» Eýrokýbok oıyndarynyń joldamasynan da qaǵyldy. Qazaqstan kýbogyn «Qaırat» ıelengen soń, Eýrododa oıyndarynyń tórtinshi joldamasy el birinshiliginde 4-orynǵa turaqtaǵan Petropavldyń «Qyzyljaryna» buıyrdy.
Bir sózben aıtqanda, fýtboldan bıylǵy Qazaqstan kýbogynyń fınaly namys pen jigerge qamshy basqan naǵyz kýboktyq oıyn boldy. Jankúıerler 3 saǵatqa sozylǵan kezdesýde 4 taımnyń jáne 19 penaltıdiń kýágerine aınaldy. Sóıtip, 2021 jylǵy fýtbol maýsymy joǵary notada aıaqtaldy.