Buqaralyq sport – ult saýlyǵynyń basty kepili ekeni barshaǵa belgili. Táýelsizdik alǵan jyldan beri «Táni saýdyń – jany saý» qaǵıdasyn berik ustanǵan Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaev qazaqstandyqtardy salamatty ómir saltyn ustanýǵa shaqyryp keledi.
Elbasy Qazaqstan halqynyń bolashaǵyna tikeleı tutqa bolatyn sport salasyn eshqashan nazardan tys qaldyrǵan emes. О́ziniń jyl saıynǵy Joldaýlarynda, túrli jıyndarda sóılegen sózderinde árdaıym sportty, onyń ishinde buqaralyq sportty damytýǵa aıryqsha kóńil bólip keledi. Tuńǵysh Prezıdenttiń sportqa degen osyndaı qamqorlyǵynyń arqasynda búginde Táýelsiz eldiń ul-qyzdary halyqaralyq jarystarda Kók týymyzdy kókte jelbiretip, Ánuranymyzdy shyrqatyp júr.
Nursultan Nazarbaev óziniń bir sózinde: «Halqymyz ejelden densaýlyqtyń qadirin jete túsinip, ony basty baılyqqa balaǵan. Osy qaǵıdany berik ustanǵan memleketimiz el halqynyń oıy sergek, deni saý bolýy úshin qolda bar múmkindiktiń bárin jasaýda. Deni saý ult básekege qabiletti bolady. Sondyqtan sporttyń buqaralyq sıpatyn damytý – memleketimizdiń strategııalyq basym baǵyttarynyń biri. Sport – eldiń mereıin asyryp, abyroıyn tasytatyn sala. Táýelsizdik jyldary el sportshylary halyqaralyq iri jarystarda top jaryp, kók baıraǵymyz asqaqtaı túsýde», degen bolatyn.
Elbasy tek sózben ǵana emes, jeke úlgisimen de Qazaqstan halqyna salamatty ómir saltyn belsendi túrde nasıhattaıdy. Tuńǵysh Prezıdent tyǵyz jumys kestesine qaramastan, árdaıym sportpen shuǵyldanýǵa ýaqyt tabady. Máselen, Nursultan Nazarbaevtyń eń súıikti sport túriniń biri – úlken tennıs. Ult kóshbasshysy raketkany erkin meńgergen jáne kortqa júıeli túrde shyǵyp turady. Aıta keterligi, úlken tennısti kóptegen saıasatker men túrli eldiń prezıdentteri janyna serik etken. О́z kezinde Elbasynyń laıyqty áriptesiniń biri Reseıdiń tuńǵysh prezıdenti Borıs Elsın bolǵan.
Sonymen qatar Tuńǵysh Prezıdenttiń taǵy bir den qoıǵan sporty – golf. Elbasy ózge de belgili álemdik saıasatkerler jáne bıznesmenderdiń qatarynda túrli halyqaralyq týrnırlerge de jıi qatysady. О́ziniń aıtýynsha, Tuńǵysh Prezıdent alǵash taý shańǵysyn 55 jasynda meńgeripti. Sodan beri Nursultan Nazarbaevtyń Shymbulaq shatqalynda jáne basqa da taýly kýrorttarda kúni búginge deıin shańǵy teýip júrgenin kórýge bolady.
Búginde Qazaqstanda jańa sport keshenderi, basseınder, golf alańdary, tennıs korttary ashylýda. Olardyń bári qazaqstandyqtardyń ıgiligi men densaýlyǵyna qyzmet etedi. Oǵan qosa, Almatyda taý shańǵysy týrızmi jyl ótken saıyn tanymal bola túsýde.
Tuńǵysh Prezıdenttiń syndarly jáne júıeli memlekettik saıasatynyń nátıjesinde qazaqstandyqtar sportpen kóbirek aınalysyp, óz densaýlyǵyna jiti kóńil bóle bastady. Salamatty ult – Qazaqstan tabysynyń basty kepili.