Jambyl oblysyna qarasty Shý aýdanynyń 39 jasar turǵyny temir jol vokzalynyń jaıaý júrginshilerge arnalǵan kópirine shyǵyp, ómirin qııýǵa táýekel etken, dep habarlaıdy Egemen.kz Ishki ister mınıstrliginiń kóliktegi polısııa departamentiniń baspasóz qyzmetine silteme jasap.
Oqıǵa ornyna kezekshi jedel-tergeý toby barǵan. Polısııa kapıtany Ázilhan Ilııasov er adammen áńgime júrgizip, ony qaýipti bıiktikten túsýge kóndirgen.
«Odan ári tekserý barysynda er adamnyń anasymen jáne kámeletke tolmaǵan qyzymen birge turatyny belgili boldy. Áıelimen 7 jyl buryn ajyrasqan. Onyń aıtýynsha, óz-ózine qol salmaq bolǵan. Ol mundaı qadamǵa barýyna ne túrtki bolǵanyn aıtýdan bas tartty. Er adam qazirgi kezde otbasymen birge», delingen habarlamada.