Táýelsizdiktiń 30 jyldyǵy qarsańynda, Elbasy, Tuńǵysh Prezıdent Nursultan Ábishuly Nazarbaev «Táýelsizdik taǵlymy» maqalasyn jarııalady, dep jazady Egemen.kz.
Nursultan Nazarbaev atalǵan maqalada egemendiktiń el úshin qundylyǵyn baǵamdap, Táýelsizdikke táı-táı qadam basqan kúrdeli kezeńder men tarıhı, taǵdyrly sátterdi eske aldy.
Elbasy eldegi Prezıdenttik bılik aýysqan kezeń jaıynda da tilge tıek etti.
«Osydan eki jarym jyl buryn elimizde prezıdenttik bılik aýysty. Maǵan: «Ata zańymyzda Sizge eshqandaı shekteýlilik joq. Sońǵy saılaýda halyqtyń 98%-yna jýyǵynyń qoldaýyna ıe boldyńyz. Qyzmetińizdi atqara berińiz», deýshiler az bolǵan joq. Biraq ár nárse óz retimen bolýy kerek», dedi Nursultan Nazarbaev.
Ol sondaı-aq, Qazaqstan tizginin ustaǵan ekinshi tulǵanyń da kezdeısoq usynylmaǵanyn aıtty.
«Otyz jylǵa jýyq el basqarǵan kezimde men janyma qanshama azamatty serik etip, kóptegen shákirt tárbıeledim. Solardyń ishinde Úkimet basqarǵan, Birikken Ulttar Uıymy bas hatshysynyń orynbasary retinde jahandyq saıasatqa jetiktigin tanytqan, táýelsizdiktiń alǵashqy jyldarynan bastap qasymnan tabylǵan naǵyz patrıot, joǵary bilikti kásipqoı tulǵa Qasym-Jomart Kemeluly Toqaevty Prezıdenttik qyzmetke usyndym. Saılaýda halyqtyń basym kópshiligi ony qoldady. Osylaısha, biz halqymyzdyń aýyzbirligin, saıasattaǵy sabaqtastyǵymyzdy kúlli álem qoǵamdastyǵyna taǵy bir qyrynan tanyta bildik», dedi Elbasy.