Shymkentte qala ákiminiń tapsyrmasy boıynsha Úkimet Qaýlysymen bekitilgen 19 áleýmettik mańyzy bar azyq-túlik taýarlaryna monıtorıng turaqty túrde júrgizilýde. Shymkent - óńirler arasynda baǵa ósimi boıynsha 6–8 oryn aralyǵynda. Jalpy qalada azyq-túlik taýarlarynyń tapshylyǵy joq, dep habarlaıdy Egemen.kz Shymkent qalasy ákimdiginiń baspasóz qyzmetine silteme jasap.
Búginde birqatar áleýmettik mańyzy bar azyq-túlik taýarlarynyń baǵasy óndirýshiniń ózindik qunynyń artýymen jáne óndiriste paıdalanatyn shıkizat baǵasynyń ósýine baılanysty qymbattaǵan bolatyn. Máselen qyryqqabat –2 tg/kg (116-ten 118 tg/kg deıin), rojkı –3 tg/kg (190-nan 193 tg/kg deıin), qumsheker –2 tg/kg (297-den 299 tg/kg deıin), birinshi surypty un –1 tg/kg (168-den 169 tg/kg deıin) ósti.
О́ńirlik turaqtandyrý qoryna jergilikti bıýdjet esebinen jalpy 5,7 mlrd teńge bólinip, iri saýda jelilerine, jergilikti taýar óndirýshilerine jáne bıznes sýbektilerge 5,4 mlrd teńgege aınalymǵa qaryz qarajat berilip, kelisimsharttar jasaldy. Iri saýda jelileriniń qatarynda «Gramad», «Fırkan», «Magnum Cash&Carry» jelileri bar.
Kásipkerlik sýbektilerimen túzilgen kelisimsharttar negizinde, áleýmettik mańyzy bar azyq-túlik taýarlary belgilengen baǵada satylyp, qala turǵyndary birinshi qajetti azyq-túlik taýarlaryn qala aýmaǵynda ornalasqan saýda nysandarynan naryq baǵasynan tómen baǵada tutynýda.
Baǵany turaqtandyrý maqsatynda:
- 3 jerden jyljymaly áleýmettik núkteleri;
- apta saıyn azyq-túlik jármeńkeleri;
- áleýmettik dúken;
- iri saýda jelileri, azyq-túlik bazarlary jáne jergilikti taýar óndirýshilerimen azyq-túlik taýarlarynyń baǵasyn negizsiz ósirmeý jóninde eki jaqty ortaq 14 memorandýmǵa qol qoıyldy;
- deldaldyq shemalardy qaraý jóninde arnaıy komıssııa quryldy.