О́tken demalysta Temirtaýda jeke úılerdiń birinen órt shyqty. Qutqarýshylar oqıǵa ornynan úı ıesi men jubaıynyń denesin tapty, dep habarlaıdy Egemen.kz.
«Temirtaýda otqa abaısyz qaraý (temeki shegý) saldarynan turǵyn úıdiń aǵash edeni, sondaı-aq, jalpy aýmaǵy 15 sharshy metr bolatyn turmystyq zattar men jıhazdar janyp ketti. О́rt ornynda eki adam zardap shekti. Oqıǵa ornynan úı ıesi men áıeliniń denesi tabyldy. Qaıtys bolǵan 1952 jáne 1956 jyly týǵan azamattar», dep habarlady Qaraǵandy oblysy Tótenshe jaǵdaılar departamentiniń baspasóz qyzmeti.
Prıozersk qalasyndaǵy turǵyn úıde bolǵan órt saldarynan taǵy bir adam qaıtys boldy.
«Prıozersk qalasynyń Alash kóshesinde jalpy alańy 15 sharshy metr bolatyn turǵyn úıdiń aǵash qabyrǵalary men qalqalary órtendi. Oqıǵa ornynda 1954 jyly týǵan áıeldiń denesi tabyldy. Oqıǵanyń mán-jaıy, órttiń shyǵý sebebi anyqtalyp jatyr», dep tolyqtyrdy vedomstvodan.