Tennısten ulttyq quramalar arasyndaǵy 2022 jylǵy Devıs kýbogy (álem chempıonaty) jarysynyń irikteý kezeńine jerebe tartyldy.
Qazaqstan tennıs federasııasynyń baspasóz qyzmeti taratqan málimet boıynsha, jerlesterimiz fınaldyq kezeńge joldama alý úshin Norvegııamen kúsh synasatyn boldy. Match kelesi jyldyń 4-5 naýryz kúnderi Norvegııada ótedi. Devıs kýbogynyń irikteý matchtary tórt jekeleı jáne bir juptyq básekeden turady jáne úsh settik formatta uıymdastyrylady dep josparlanǵan.
Irikteý kezeńinde úzdik shyqqan 12 komanda fınaldyq saıysqa joldama alady. Olarǵa bıylǵy Devıs kýbogynda jeńimpaz atanǵan Reseı quramasy men fınalda óner kórsetken Horvatııa tennısshileri qosylady. Sondaı-aq Ulybrıtanııa men Serbııa quramalary arnaıy shaqyrtýmen barady.
Kúni keshe Madrıdte máresine jetken bıylǵy Devıs kýbogynyń fınaldyq saıysynda Qazaqstan quramasy shırek fınalǵa deıin jetken bolatyn. Jerlesterimiz toptyq kezeńde Shvesııa jáne Kanada quramasyn jeńgenimen, 1/4 fınalda Serbııadan jeńilip qaldy. Bir aıta keterligi, bizdiń jigitter osymen altynshy márte osy jarystyń shırek fınalynda baq synady.