Atyraýda kópirden sekirip ketken júkti áıel qutqaryldy, dep habarlaıdy Egemen.kz.
Oblystyq TJD baspasóz qyzmeti taratqan málimet boıynsha, búgin júkti áıel jaıaý júrginshiler kópirinen sekirip ketken. Oqıǵa tańerteń saǵat 09.35 kezinde bolǵan.
Atyraý oblystyq polısııa departamentiniń qyzmetkerleri qaıyqpen áıeldiń janyna deıin júzip, ony sýdan shyǵaryp aldy.
Sosyn polıseıler kelinshekti Atyraý oblysy TJD qyzmetkerlerine tapsyrdy. Qutqarýshylar dereý jasandy tynys alý jáne júrek massajy arqyly alǵashqy kómek kórsetken.
Qutqarýshylardyń jedel jáne batyl áreketiniń arqasynda áıel adam jedel járdem kelgenge deıin qutqaryldy.
Qutqarý operasııasyna Atyraý oblysy tótenshe jaǵdaılar departamentiniń 5 qyzmetkeri men bir tehnıka qatysty.