Birinshi orta salmaqta judyryqtasatyn qazaqstandyq boksshy Batyr Júkembaevtyń (18-1, 14 KO) kelesi jekpe-jeginiń ýaqyty men qarsylasynyń esimi belgili boldy.
Boksshylardyń statıstıkalyq málimetterin júrgizetin BoxRec basylymynyń aqparatyna súıensek, otandasymyz óziniń kelesi jekpe-jegin 12 jeltoqsan kúni AQSh-tyń Sprıngfıld qalasynda ótkizedi. Onyń bul jolǵy qarsylasy 35 jastaǵy meksıkalyq Hýan Hose Martınes Alvares (28-10, 20 KO) bolmaq. Aıqas alty raýndqa josparlanǵan.
30 jastaǵy Jambyl oblysynyń týmasy óziniń sońǵy jekpe-jegin osy jyldyń mamyr aıynda AQSh-ta pýertorıkolyq Sabrıel Matıasqa (17-1, 17 KO) qarsy ótkizip, karerasynda alǵash ret jeńildi. Bul onyń kásipqoı bokstyń otany sanalatyn AQSh-taǵy alǵashqy aıqasy edi. Ol buǵan deıingi kezdesýleriniń bárin Kanadada ótkizip kelgen bolatyn. Osy jeńilisinen keıin Batyr Júkembaev kanadalyq Eye of The Tiger Management kompanııasymen kelisimshartyn úzdi.