Jeńil salmaq dárejesindegi UFC-diń burynǵy álem chempıony Habıb Nýrmagomedov AQSh sportshysy Dastın Pore men brazılııalyq Charlz Olıveıra arasyndaǵy shaıqasqa qatysty pikirin bildirdi, dep habarlaıdy Egemen.kz.
«Men Dastın Pore jeńiske jetedi dep oılaımyn. Ol – júregi bar jaýynger. Álbette, Charlz óte qaýipti qarsylas. Dál qazir Olıveıra naǵyz chempıon. Toǵyz kezdesýdi qatar jeńgeni, Tonı Fergıýsondy utqany bárimizdiń jadymyzda. Meniń oıymsha shaıqas tartysty ári qyzyq bolady. Áıtkenmen men Dastın jeńisti julyp alatyndyǵyna senemin», deıdi reseılik sportshy.
Esterińizge sala keteıik, Charlz Olıveıra men Dastın Pore 11 jeltoqsan kúni AQSh-tyń Las-Vegas qalasynda ótetin UFC 269 týrnıri aıasynda segiz buryshta kezdesedi.