Elimizdiń Táýelsizdik kúni qarsańynda Nur-Sultan qalasynda balalar arasynda mánerlep oqýdan «Sen týǵan Qazaqstanyńdy bilesiń be?» atty respýblıkalyq baıqaýynyń qorytyndysy shyqty, dep habarlaıdy Egemen.kz.
Bul baıqaýdy Aqparat jáne qoǵamdyq damý mınıstrligi men «Shuǵylakitap» baspasynyń qoldaýymen «Rýhanı jańǵyrý» qazaqstandyq qoǵamdyq damý ınstıtýtynyń óńirlik jobalyq keńsesi uıymdastyrdy.
Memleket Basshysy Qasym-Jomart Toqaev Ulttyq qoǵamdyq senim keńesiniń tórtinshi otyrysynda kitap oqıtyn ultty qalyptastyrý úshin jas qazaqstandyqtar arasynda oqý mádenıetin damytýǵa jáne ilgeriletýge erekshe nazar aýdarǵany belgili. Osyǵan baılanysty «Rýhanı jańǵyrý» baǵdarlamasyn ulttyq jańǵyrý kezeńine kóshirý jónindegi Jol kartasyna sáıkes, balalar oqýynyń respýblıkalyq konkýrsy ótkizildi.
Baıqaýdyń basty maqsaty – kitap oqýǵa degen qyzyǵýshylyqty qalyptastyrý, óskeleń urpaqqa óz eli úshin maqtanysh sezimin oıatý jáne «Rýhanı jańǵyrý» baǵdarlamasynyń ıdeıalaryn túsindirý.
Baıqaýǵa Qazaqstannyń barlyq óńirinen 3 600-den astam jalpy bilim beretin mektepten 37 myńnan astam orta býyn oqýshysy qatysty. Baıqaý prosesi óńirlik ákimdikterdiń, oblystyq, qalalyq, aýdandyq bilim bólimderiniń kómegimen uıymdastyryldy.
Qorytyndy respýblıkalyq kezeńge Qazaqstannyń bes óńirinen 25 bala qatysty. Baıqaý barysynda qatysýshylar týǵan ólkeniń tarıhy, mádenıeti, sondaı-aq «Rýhanı jańǵyrý» baǵdarlamasynyń prınsıpteri boıynsha suraqtarǵa jaýap berip, kvestke qatysty.
Búgin, 10 jeltoqsanda, Nur-Sultanda «Rýhanı jańǵyrý» qazaqstandyq qoǵamdyq damý ınstıtýtynyń keńsesinde respýblıkalyq konkýrstyń jeńimpazdaryn marapattaý rásimi ótti. Is-sharaǵa QR Aqparat jáne qoǵamdyq damý vıse-mınıstri Bolat Tlepov, «Rýhanı jańǵyrý» KIOR Basqarma Tóraǵasy Asylbek Esenbaev, oblys ákimderiniń orynbasarlary, jeńimpaz óńirlerdiń bilim basqarmalarynyń basshylary jáne tikeleı baıqaýǵa qatysýshylar qatysty.
«Bul baıqaýdyń tárbıelik negizi bolǵan kitaptarda Qazaqstannyń memlekettik rámizderi, mádenıeti, salt-dástúrleri men ádet-ǵuryptary, tarıhı eskertkishteri, kıeli jerleri týraly aıtylady. Halyq maqal-mátelderi, jumbaqtary, sondaı-aq taý men dala týraly ańyz-áńgimeler túrindegi ǵasyrlar danalyǵy mektep oqýshylarynyń oı-órisin keńeıtip, ulttyq kodtyń saqtalýyna yqpal etedi», dedi B.Tlepov qatysýshylardy quttyqtaý sózinde.
Baıqaý komıssııasynyń sheshimine sáıkes, besinshi oryndy Jezqazǵan qalasyndaǵy «О́rken» mamandandyrylǵan mektep-ınternatynyń oqýshysy Nazym Joltaı ıelendi. Tórtinshi oryndy Aqtóbe oblysy Shalqar aýdany oblystyq mamandandyrylǵan fızıka-matematıka mektep-ınternatynyń oqýshysy Fatıma Mýapykova aldy. Úshinshi orynǵa elordalyq №86 mektep-gımnazııasynyń oqýshysy Eraly Qozy ıe boldy. Ekinshi oryndy Baıqońyr qalasyndaǵy №273 orta mekteptiń oqýshysy Uldaı Qarataeva jeńip aldy. ShQO Aıagóz aýdany №5 orta mektebiniń oqýshysy Janel Toqanova «Sen týǵan Qazaqstanyńdy bilesiń be?» respýblıkalyq baıqaýynyń jeńimpazy atandy.
Jeńimpazdar arnaıy gramotalarmen jáne baǵaly syılyqtarmen marapattaldy.
Shara sońynda Aqparat jáne qoǵamdyq damý vıse-mınıstri Bolat Tlepov kitap oqýǵa degen qyzyǵýshylyqty odan ári arttyrý maqsatynda aýdan, qalalardyń júldegerleri men mektep kitaphanalaryna da syılyqtar jiberilgenin atap ótti.