Qasym-Jomart Toqaev Túrkııanyń Ádilet jáne damý partııasy tóraǵasynyń orynbasary Bınalı Iyldyrymdy qabyldady, dep habarlaıdy Egemen.kz Aqordaǵa silteme jasap.
Qazaqstan Prezıdenti jýyrda Túrki memleketteri uıymy Aqsaqaldar keńesiniń tóraǵasy bolyp saılanǵan Bınalı Iyldyrymdy qabyldady.
Bınalı Iyldyrym qabyldaǵany úshin Qasym-Jomart Toqaevqa alǵys aıtyp, Prezıdentti jáne Qazaqstan halqyn el Táýelsizdiginiń 30 jyldyǵymen quttyqtady. Sonymen qatar ekijaqty strategııalyq seriktestikti odan ári nyǵaıtý úshin Túrkııa Respýblıkasynyń Prezıdenti Rejep Taıyp Erdoǵannyń Memleket basshysy Qasym-Jomart Toqaevty kelesi jyly Ankaraǵa resmı saparmen kelýge shaqyrǵan sálemin jetkizdi.
Kezdesýde qazaq-túrik strategııalyq áriptestiginiń qazirgi jaǵdaıy men perspektıvalary, saıası, ekonomıkalyq jáne mádenı-gýmanıtarlyq qarym-qatynastar máseleleri talqylandy.
Qasym-Jomart Toqaev joǵary deńgeıdegi saıası dıalogtyń arta túskenin, sondaı-aq memleketter arasyndaǵy saýda-ekonomıkalyq jáne mádenı-gýmanıtarlyq baılanystardyń qarqyndy damyp kele jatqanyn atap ótti.
Qazaqstan Prezıdenti bıyl qarasha aıynda Ystanbulda ótken Túrki memleketteri uıymnyń tarıhı sammıtiniń qorytyndysy boıynsha qabyldanǵan sheshimderdiń mańyzdylyǵyna mán berip, Bınalı Iyldyrymdy osy Uıymnyń Aqsaqaldar keńesiniń tóraǵasy laýazymyna taǵaıyndalýymen quttyqtady.