Nurlan Nyǵmatýlın Táýelsizdiktiń 30 jyldyǵyna oraı Aqtóbe oblysynyń turǵyndaryna memlekettik nagradalardy tabys etti, dep habarlaıdy Egemen.kz.
Májilis tóraǵasy Nurlan Nyǵmatýlın Aqtóbe oblysynyń turǵyndaryn el egemendiginiń mereıtoılyq merekesimen quttyqtady.
Onda Májilis spıkeri Qazaqstan Táýelsizdiginiń 30 jyldyǵy bolashaqqa senimmen qaraýǵa múmkindik beretin, el tarıhyndaǵy mańyzdy kezeń ekenin atap ótti. Búgin Aqtóbede el men óńirdiń damýyna eleýli úles qosqan aımaq turǵyndaryna memlekettik nagradalardy tapsyrýǵa arnalǵan saltanatty rásim ótti. Qazaqstan Prezıdentiniń tapsyrmasymen Májilis spıkeri Nurlan Nyǵmatýlın aqtóbelikterge memlekettik nagradalardy tabys etti.
Palata tóraǵasy Táýelsizdik jyldarynda Aqtóbe el ekonomıkasyna yqpal etken iri jobalardy qolǵa alǵan, aldyńǵy qatarly ónerkásiptik aımaqqa aınalǵanyn, oblystan ótetin «Batys Eýropa – Batys Qytaı» halyqaralyq joldary búginde el ekonomıkasyna erekshe serpin bergenin atap ótti.
«Aqtóbe oblysy Elbasy Nursultan Ábishuly Nazarbaevtyń qoldaýymen, 30 jyldyń ishinde tek aımaqtyń ǵana emes, jalpy elimizdiń damýyna zor úles qosqan negizgi ındýstrııaldyq ólkege aınaldy. Búgingi kúni Memleket Basshysy Qasym-Jomart Kemeluly Toqaevtyń bastamasymen elimizde, sonyń ishinde, osy Aqtóbede jańa áleýmettik-ekonomıkalyq baǵdarlamalar júzege asyrylyp jatyr. Osy Táýelsizdiktiń arqasynda kelgen tabystarymyz aldaǵy ýaqytta da elimizdi, oblystardy jańa bıikterge jetkizetini sózsiz», dedi Nurlan Nyǵmatýlın.
Sonymen qatar, Májilis spıkeri Aqtóbe oblysynda Táýelsizdik jyldary jalpy ondaǵan mańyzdy jobalar júzege asyrylǵanyn aıtyp, «jasyl» tehnologııalar belsendi júrgizilip jatqanyn, jyl saıyn agrarlyq salada 1000-ǵa jýyq jańa sharýashylyq ashylatynyn atap ótti.
El men oblystyń áleýmettik-ekonomıkalyq jáne mádenı damýyna qosqan eleýli úlesi úshin aqtóbelikter joǵary memlekettik nagradalarǵa ıe boldy.
II dárejeli «Barys» ordenimen belgili qazaqstandyq ǵalym-fılosof, Q. Jubanov atyndaǵy Aqtóbe memlekettik ýnıversıtetiniń professory Amangeldi Aıtaly marapattaldy. «Parasat» ordenimen-Oblystyń Qoǵamdyq keńesiniń tóraǵasy Marat Qoılybaev marapattaldy. Eńbek ardageri Bekarystan Myrzabaı, oqytýshy Halel Qusaıynov «Qurmet» ordeniniń ıegeri atandy, al III dárejeli «Eńbek Dańqy» ordenimen – temirjolshy Qantóre Aýash, usta Baıǵalı Mataǵulov, Aqtóbe ferroqorytpa zaýytynyń kranshysy Galına Ýteshova marapattaldy.
«Eren eńbegi úshin» medalimen marapattalǵandardyń qatarynda dárigerler Qýanyshqul Dúısembekova, Nurlan Qaýqaqov jáne Amet Nábıev, jýrnalıster Elena Akchýrına men Baıandy Sársembına, oblystyq fılarmonııanyń bas dırıjeri Mádına Qabıjanova-Bısenǵalıeva bar.
«Shapaǵat» medalimen medbıkeler Gúlbada Bımanova men Olga Kefer marapattaldy. Qazaqstan Respýblıkasynyń «Qurmet gramotasymen» marapattalǵandardyń ishinde muǵalimder Baqtyǵul Qoıshyǵulova men Janna Habıbýllına, sondaı-aq Aqtóbe oblystyq fılarmonııasynyń qazaq kameralyq hory bar.