Qalanyń 26 jastaǵy turǵyny aqshany jeńil aınaldyrý usynysymen 30 azamatty aldady, dep jazady Egemen.kz Nur-Sultan qalasy polısııa departamentiniń baspasóz qyzmetine silteme jasap.
Kúdikti 2021 jyldyń tamyz aıynan qarashaǵa deıin WhatsApp áleýmettik jelisinde tanystary men dostarynyń ortaq tobyn quryp, onda aqshalaı qarajatty 100 paıyz ósimmen ınvestısııalaýdy usynǵan.
Jańa klıentterdi «uzynqulaq» kómegimen taýyp otyrǵan, jazylýshylar tanystaryn chatqa qosyp otyrdy. Aldanǵan azamattar 20 myń teńgeden bastalatyn somadaǵy aqshany «ınvestısııalaǵan», jalpy soma shamamen 8 mln teńgeni qurady. Kúdikti qolǵa túsirgen aqshany jumsap tastaǵan. Alaıaq er adam jedel aldyn alý sharasy barysynda ustaldy. Qazirgi kezde oǵan qatysty QR Qylmystyq kodeksiniń 190-baby, 3-bólimimen (alaıaqtyq) sot aldyndaǵy tergep-tekserý amaldary júrgizilýde.
Ustalǵan er adamnyń 2015 jyly osyǵan uqsas qylmys jasaǵany úshin sottalǵany anyqtaldy. Nur-Sultan qalasynyń polısııa departamenti azamattardy qyraǵy bolyp, jelidegi alaıaqtarǵa senim bildirmeýge keńes beredi.
«Internet arqyly aqshany kóbeıtý aksııasyna qatyspańyzdar. Alaıaqtar paıdalanýshylarǵa tıimdi ári utylýsyz usynystar jasaıdy. Aqshany ońaı aınaldyrý boıynsha kúdikti jobalarǵa ınvestısııalamaǵan jón» dep eskertedi polısııa.
Barlyq quqyqtar qorǵalǵan. inform.kz belsendi siltemeni paıdalanyńyz https://www.inform.kz/kz/elordada-internet-arkyly-zhenil-aksha-tabudy-uade-etken-alayak-ustaldy_a3873298