Qostanaıda «Altyn mıkrofon» halyqaralyq festıvali márege jetti. Baıqaýdyń sheshýshi kezeńinde elimizdiń ár óńirinen jáne alys-jaqyn shet elderden kelgen jas ánshiler óner kórsetti.
Belgili ánshi Beıbit Seıdollauly tóraǵalyq etken qazylar alqasynyń quramyna Armenııa, Bolgarııa, Qyrǵyzstan, Belorýssııa, Ýkraına memleketteriniń bilikti mamandary otyrdy. Olardyń árqaısysy ózderimen birge endi qalyptasyp kele jatqan eń daryndy degen tańdaýly bir-eki ánshiden erte kelip, Tobyl óńirindegi óner baıqaýyna qosty. Osydan bolar, bıylǵy «Altyn mıkrofonnyń» deńgeıi joǵary boldy. Kishkentaı ánshilerdiń arasyndaǵy naǵyz úlken óner básekesi deýge bolady.
О́ner festıvaliniń ashylý saltanatyna qatysqan oblys ákiminiń orynbasary Baqyt Esimova ár elden, ár óńirden úmit arqalaı kelgen jas ánshilerge sáttilik tilep, bul dástúrli baıqaýdyń bási joǵary ekenin aıtty.
– Búginde búkil elge tanylǵan Qostanaı óńiriniń talanttary osy baıqaýdan shyńdalyp shyqqan. Sondyqtan, bul festıvaldy óz nátıjesin, jemisin bergen taǵylymdy óner mektebi dep aıtýǵa bolady. Mysaly, kezinde «Slavıan bazarynda» top jarǵan Ernar Sadyrbaev osy baıqaýdan ósip shyqqan bala. Búgingi Abaı atyndaǵy memlekettik akademııalyq opera jáne balet teatrynyń beldi solısi Balýan Berkenov te osy «Altyn mıkrofon» festıvalinen ósip shyqqan ánshi, – dedi B.Esimova.
Baıqaýdyń bastapqy kezeńderi onlaın túrde ótti. Fınaldyq básekege osy irikteýden ótip, júzden júırik shyqqan 41 ónerpaz qatysty. Olar jas erekshelikterine qaraı kishi, orta, eresek jáne kásipqoı topqa bólinip, árqaısysy eki-eki ánnen oryndap shyqty.
Festıval jeńimpazdary qazylar alqasynyń qalaýy boıynsha anyqtaldy. 7-10 jas aralyǵyndaǵy balǵyndar ishinen Alsý Ultýǵanova birinshi oryndy jeńip aldy. Al 11-13 jas aralyǵyndaǵy qatysýshylar arasynan qostanaılyq Iаsmına Aıýpova, 14-17 jas aralyǵyndaǵy ónerpazdardyń ishinen Darııa Matveeva úzdik shyqty.
«Kásipqoılar» toby boıynsha 1-oryndy qostanaılyq jas ánshi Almat Jańabaı jeńip aldy. 2-orynǵa túrkııalyq Volkan Talshyk laıyq dep tanyldy. Al Gran-Prı syılyǵyn Nur-Sultan qalasynan kelgen jas daryn Aslan Amangeldıev jeńip aldy.
Bıyl festıvalda Qazaqstannyń eńbek sińirgen qaıratkeri, kóp jyldar boıy osy baıqaýǵa qazylyq etip, talaı talanttyń jolyn ashqan kompozıtor Keńes Dúısekeev atyndaǵy arnaıy syılyq taǵaıyndaldy. Tuńǵysh júldeni Qyzylorda oblysynan kelgen taǵy bir talantty jas ónerpaz Eraly Eskendir ıelendi.
QOSTANAI