Kenshiler astanasynda Qazaqstan Respýblıkasy Táýelsizdiginiń 30 jyldyǵy qarsańynda Prezıdent Qasym-Jomart Toqaevtyń Jarlyǵymen eńbek ardagerleri, bilim berý, densaýlyq saqtaý, mádenıet, buqaralyq aqparat quraldary, óndiris salasyndaǵy kórnekti qaıratkerler, memlekettik organdar men aýyl sharýashylyǵy salasynyń ókilderi marapattaldy, dep jazady Egemen.kz oblys ákiminiń baspasóz qyzmetine silteme jasap.
Bul nagradalardy Memleket basshysynyń atynan Qaraǵandy oblysynyń ákimi Jeńis Qasymbek tabys etti.
Elimizdiń áleýmettik-ekonomıkalyq jáne mádenı damýyna qosqan úlesi úshin, memlekettik jáne qoǵamdyq qyzmettegi eleýli eńbegi úshin óńirdiń 60 turǵyny orden, medaldarmen, Qurmet gramotalarymen jáne alǵys hattarmen marapattaldy. Sonymen birge úsh adamǵa «Qaraǵandy oblysynyń Qurmetti azamaty» ataǵy berildi.
Saltanatty jıynda sóılegen óńir basshysy 30 jyl ishinde Qaraǵandy oblysynda kóptegen jumystar atqarylǵanyn baıandady. О́ndiris kólemi men turǵyn úı qurylysynyń qarqyny artyp, jumyssyzdyq tómendedi, jyl saıyn ómir súrý sapasy artyp keledi. Munyń bári aımaqta turatyn adamdardyń eren eńbeginiń arqasynda múmkin bolǵanyn aıtty ol.
«Barlyq sandardyń astarynda bizdiń jerlesterimizdiń ǵylym men bilim, sport, mádenıet, medısına, óndiris pen kásipkerliktegi orasan eńbegi men jetistikteri tur. Sizderdiń barlyǵyńyz memleketimizdiń qalyptasýyna, egemendiktiń nyǵaıýyna jáne elimizdiń áleýmettik-ekonomıkalyq damýyna eleýli úles qostyńyzdar. Bul úles laıyqty baǵalandy», dep qorytty sózin J.Qasymbek.
«Qurmet» ordenimen marapattalǵan jeti qaraǵandylyqtyń arasynda Qalı Baıjanov atyndaǵy Qaraǵandy konserttik birlestiginiń basshysy Talǵat Ydyrysov bar. О́ner adamy bul joǵary nagradanyń ózi úshin qurmetti syı ekenin atap ótti. «Men ózim basqaratyn barlyq mýzykanttar men ujymdarǵa alǵysymdy bildiremin jáne barlyǵyna shyǵarmashylyq tabys tileımin», – dedi T.Ydyrysov.
Oblystyń bes turǵynyna jemisti eńbegi men óndiristik kórsetkishterin jaqsartqany úshin III dárejeli «Eńbek Dańqy» ordeni tabys etildi. «Qazaqstan» shahtasynyń jerasty elektr slesari Evgenıı Sekırchın bul bolashaqtaǵy jemisti jumysqa berilgen avans ekenin atap ótti. Shahtada 30 jyl jumys istegen maman Qazaqstan halqyna beıbitshilik pen gúldený tiledi.
Erligi men qaısarlyǵy úshin Chernobyl AES-indegi apattyń zardaptaryn joıýshy Muqat Sosıalov «Erligi úshin» medalimen marapattaldy.
Sińirgen eńbegi úshin 20 adam «Eren eńbegi úshin» ordenimen marapattaldy. Olardyń qatarynda Temirtaý qalasynyń № 24 jalpy bilim beretin mektebiniń pedagogy Olga Dvoreskaıa da boldy. Marapat ıesi pedagogıkalyq qyzmetin joǵary baǵalaǵany, ózin dáleldeýge múmkindik bergeni úshin alǵys aıtty.
Belsendi jáne jemisti qyzmeti, meıirimdiligi jáne qaıyrymdylyǵy úshin 11 qaraǵandylyq «Shapaǵat» medalimen marapattaldy.
Belsendi ómirlik ustanymy men eren eńbegi úshin 13 adam Qazaqstan Respýblıkasynyń Qurmet gramotalarymen marapattaldy. Eki qaraǵandylyq Qazaqstan Prezıdentiniń Alǵys hattaryna ıe boldy.
Sondaı-aq, saltanatty marapattaý rásimi barysynda Qaraǵandy oblysynyń jańa qurmetti azamattarynyń esimderi jarııalandy. Bul qurmetke Qaztutynýodaǵy Qaraǵandy ekonomıkalyq ýnıversıtetiniń rektory Erqara Aımaǵambetov, Jezqazǵan qalasy Qoǵamdyq keńesiniń tóraǵasy Saǵyndyq Qojamseıitov jáne medısına ǵylymdarynyń doktory, professor Sergeı Lohvıskıı ıe boldy.
Kórsetilgen qurmetke rızashylyq bildirgen qadirmendi aqsaqal Erqara Aımaǵambetov Tuńǵysh Prezıdent-Elbasynyń eńbegin, onyń salıqaly ishki jáne syrtqy saıasatyn joǵary baǵalaı kelip, Qazaqstannyń bolashaqta mindetti túrde rýhanı baı, adamgershilik jaǵynan taza jáne ekonomıkalyq turǵyda damyǵan memleket bolatynyna nyq senim bildirdi.