Qaraǵandy qalasyndaǵy burynǵy Oktıabr aýdanynda turǵyndar kópten kútken qýanyshty oqıǵa boldy. Atap aıtqanda, quramyna Maıqudyq, Prıshahtınsk jáne Suryptaý eldi mekenderi enetin bul aýdannyń endi Álıhan Bókeıhan atyndaǵy aýdan bolyp atalýyna baılanysty saltantty is-shara uıymdastyryldy, dep jazady Egemen.kz.
Jıynda sóz sóılegen Qaraǵandy qalasynyń ákimi Ermaǵanbet Bólekbaev turǵyndardy aıtýly qýanyshpen quttyqtady. Sondaı-aq ol aýdandy qaıta ataý – bul eń aldymen Álıhan Bókeıhannyń tarıhı qyzmetine, jalpy elimizdiń tarıhyna berilgen qurmet ekenin atap ótti.
– Aýdannyń ataýy ǵana emes, kelbeti de ózgeredi. Sońǵy birneshe jylda úılerdiń qasbetterin, shatyrlaryn, kireberis joldary men oramishilik joldardy jóndeý boıynsha úlken jumystar júrgizildi. Maıqudyq ortalyq jolyn aýqymdy qaıta qurý aıaqtaldy. Birneshe zamanaýı turǵyn úı keshenderiniń qurylysy júrip jatyr, shaǵyn aýdandarda jańa emhanalar iske qosyldy. Qaıta qurý jumystarynan keıin «Lıteıshık» stadıony ashyldy. Alda áli talaı ózgerister bolady, – dedi qala basshysy.
Is-sharaǵa qatysqan Qaraǵandy qalalyq máslıhatynyń hatshysy Qudaıbergen Beksultanov Táýelsizdik kúni qarsańynda Oktıabr aýdanynyń Qazaqstannyń birligin, onyń jarqyn bolashaǵyn armandaǵan Álıhan Bókeıhan atyndaǵy aýdan bolyp ózgertilgeni tarıhı máni zor oqıǵa dep atap ótti.
Eske salar bolsaq, Álıhan Bókeıhan atyndaǵy aýdan 1938 jyly Qaraǵandynyń soltústik bóliginde qurylǵan. Ol 1961 jylǵa deıin Stalın aýdany bolyp atalyp keldi. Sodan keıin Oktıabr aýdany bolyp ózgertildi. Jer kólemi 22,4 myń gektar bolatyn aýdanda 227 myń adam turady.