QR Prezıdenti Qasym-Jomart Toqaevtyń Jarlyǵymen Kaspi.kz basshysy ári negizin qalaýshylardyń biri Mıhaıl Lomtadze II dárejeli «Dostyq» ordenimen marapattaldy, dep jazady Egemen.kz.
«Dostyq» ordeni - qoǵamda ózara tatýlyqty saqtaý jónindegi jemisti jumysy, halyqtar arasynda beıbitshilikti, dostyq pen yntymaqtastyqty nyǵaıtýǵa sińirgen eńbegi úshin beriletin marapat.
Kaspi.kz basshysy Mıhaıl Lomtadzege ordendi QR Premer-mınıstri Asqar Mamın Respýblıka Táýelsizdiginiń 30 jyldyǵyna arnalǵan saltanatty marapattaý rásiminde tabys etti. Sondaı-aq memlekettik nagradalar eńbek ardagerlerine, mınıstrlikterdiń, vedomstvolardyń, ulttyq kompanııalardyń qyzmetkerlerine, isker orta ókilderine berildi.
«Táýelsizdiktiń 30 jyldyǵy – Qazaqstan tarıhyndaǵy mańyzdy kezeń. Táýelsizdik – memlekettiktiń berik negizi, erkindik, turaqtylyq pen ultaralyq kelisimniń sımvoly. Bizdiń táýelsizdigimiz árbir qazaqstandyqtyń óz eli men jeriniń ıgiligi úshin qajyrly eńbeginen, árqaısymyzdyń damyǵan ári myqty memlekette ómir súrýge degen umtylysymyzdan turady», dedi Asqar Mamın saltanatty jıynda.
«Kaspi.kz mıssııasy - ınnovasııalyq servıster men ónimderdi ázirlep, qazaqstandyqtardyń ómirin jaqsartý. Bizdiń komanda: Qazaqstandyqtar úshin, Qazaqstan úshin ne jaqsy bolsa, Kaspi.kz úshin de sol jaqsy ekenine senedi. Biz aldaǵy ýaqytta da súıikti klıentterimizdi qýantyp, búkil álemge Qazaqstanda qandaı biregeı kompanııalar paıda bolyp, tehnologııalar ázirlenip jatqanyn kórsetý úshin bar kúsh-jigerimizdi salamyz», dedi Mıhaıl Lomtadze.
Qazaqstan ınnovasııada, sıfrlandyrýda jáne qazaqstandyqtardyń ómirin jaqsartatyn fınteh ónimderin jasaýda buryn-sońdy bolmaǵan serpilis jasady. Kaspi.kz osy ınnovasııalardyń draıverine aınalyp, el ishinde ǵana emes, álemdik arenada úlgi bolyp otyr. Bul týraly bedeldi álemdik sarapshylar aıtýda.
«Meni Kaspi qoldanbasy tań qaldyrdy. Bul bolashaqtyń úlgisi, bul bolashaqtyń kórinisi», dedi Atlantıkalyq keńestiń aǵa ǵylymı qyzmetkeri, Energııa jáne qaýipsizdik baǵdarlamasynyń (ITIC) dırektory Arıel Koen «Astana klýbynyń» altynshy otyrysynda.
«Biz Qazaqstannyń qun tizbegin kóterýge, óndiristik jáne biliktilik bazasyn jáne qyzmet kórsetý sektoryn damytýǵa umtylysyn qoldaımyz. Men, mysaly, Kaspi - qarjy qyzmetterin kórsetýge arnalǵan tamasha qosymsha ekenin estidim», dedi Qazaqstanǵa jýyrda jasaǵan sapary barysynda Ulybrıtanııanyń Saýda mınıstri Ranıl Djaıavardena.
Kaspi.kz-tiń ótken jylǵy sátti IPO-sy eldiń ınvestısııalyq tartymdylyǵyn arttyrdy. Kaspi.kz-tiń ınvestor bolyp tabylatyn birqatar bedeldi álemdik ınvestısııalyq qorlar buryn-sońdy Qazaqstanǵa ınvestısııa salǵan emes.
Búgingi tańda Qazaqstandaǵy ınnovasııalardyń damý qarqyny kóptegen elderge qaraǵanda joǵary. Bul qubylys qazirdiń ózinde shetelde zerttelip jatyr. Garvard bıznes mektebi Kaspi.kz tarıhy týraly materıal jazdy. Ol boıynsha magıstranttar oqıdy.
Eske salaıyq, buǵan deıin Mıhaıl Lomtadze pandemııanyń qıyn kezeńinde eldiń damýyna qosqan úlesi úshin «Halyq alǵysy» medalimen marapattalǵan bolatyn.