Qyzylordada baspana kezeginde turǵandarǵa Táýelsizdiktiń 30 jyldyǵy qarsańynda shahardyń sol jaǵalaýyndaǵy 680 páterlik 14 turǵyn úıdiń kilti berildi. Oblys ákimi Gúlshara Ábdiqalyqova men qala ákimi Ǵanıbek Qazantaev qatysqan sharada páterli bolǵandardyń deni kópbalaly jáne áleýmettik az qamtylǵan otbasylar.
Aımaq basshysy turǵyndardy qonys toıymen quttyqtap, Qyzylorda turǵyn úı qurylysy jaǵynan basqa óńirlermen salystyrǵanda kósh basynda kele jatqanyn atap ótti. Táýelsizdik alǵan 30 jylda oblysta 8 mln sharshy metrge jýyq turǵyn úı paıdalanýǵa berilgen.
– Barshańyzdy aldymen elimizdiń eń basty ulyq merekesi – Táýelsizdigimizdiń 30 jyldyq mereıtoıymen quttyqtaımyn! Qurylysy qarqyndy Qyzylordamyzda búgin taǵy bir jańa turǵyn úıdi paıdalanýǵa berip, páter ıeleriniń qýanyshyn bólisip otyrmyz. Baspanalaryńyz sábıdiń kúmis kúlkisine bólenip, shańyraqtaryńyzdyń shattyǵy úzilmesin, – dedi G.Ábdiqalyqova.
Aımaq basshysy turǵyn úılerdi ýaqtyly jáne sapaly salǵan merdiger mekeme basshylaryna da rızashylyǵyn bildirdi. Bıyl oblysta 2 408 páterlik 110 turǵyn úıdiń qurylysy júrýde. Jyl sońyna deıin 1 608 páterlik 94 turǵyn úı paıdalanýǵa beriledi dep josparlanǵan.
Qyzylorda oblysy