Sanaǵa qandaı da suraq saq ete qalsa, ınternet ıirimine gúmp berer edik. Jaqsy-aq dúnıe, izdegenimizdi búge-shigesine deıin aldymyzǵa jaıady. Alaıda kitaptaǵy qundy dúnıe ınternette joq. Demek, «artyq bilim kitapta» deı-tuǵyn maqal ózektiligin joımaq emes. El Táýelsizdiginiń 30 jyldyǵyna oraı D.Serikbaev atyndaǵy Shyǵys Qazaqstan tehnıkalyq ýnıversıtetinde myńdaǵan kitap jınalǵan jańa kórkem ádebıet zaly ashyldy.
Saltanatty is-sharaǵa kelgen úlkender «bizdiń zamanymyzda da osyndaı kitaphana bolsa she...» dep qyzyǵyp jatty. Qyzyqsa, qyzyqqandaı-aq. Keń, jaryq. Kitap oqýǵa jaıly oryn. Qoly qalt etken stýdent, muǵalim ádebıet zalyna baryp, rýhanı bilimin tolystyryp, tynyǵyp qaıtýyna ábden bolady. Kitaphanashylardyń aıtýynsha, zal qorynda 20 myńnan astam kitap bar. Onyń ishinde proza men poezııa, zamanaýı bestsellerler, reseılik jáne sheteldik klassıka, tarıhı romannyń, fantastıka men detektıvtiń tanymal janrlaryndaǵy basylymdar bar. Sondaı-aq Abaı Qunanbaıuly, Muhtar Áýezov, Ilııas Esenberlın, Shákárim Qudaıberdiuly, Shyńǵys Aıtmatov, Omar Haııam, Djordj Baıron, Ýılıam Shekspır syndy kórnekti avtorlardyń shyǵarmalary jınalǵan.
– Biz bilim alyp jatqan oqý ornynda osyndaı kitaphananyń ashylyp jatqanyna qýandyq. Keshkilik sabaqtan bosaǵan soń bir kirip shyǵý ádet bolyp ketetin sııaqty. Sebebi, munda bas kótermeı kitap oqıtyndaı atmosfera bar. Jaıly, yńǵaıly. Ras, kirse, shyqqysyz, – deıdi Menedjment fakýltetiniń 4-kýrs stýdenti Tomırıs Tohtarbekova.
«Jańa gýmanıtarlyq bilim. Qazaq tilindegi 100 jańa kitap» jobasy boıynsha kitaptar qoljetimdi bolsa, Abaı buryshyna kitap kórmesi uıymdastyrylǵan. Al bilim berý baǵdarlamalaryna engizilgen jańa oqýlyqtar, oqytýshylar men stýdentter úshin taptyrmas oqýlyqtar.
Aıta keterligi, bilim ǵıbadathanasynda 3 myńnan astam kitaptyń elektrondy katalogy bar. Paıdalanýshylar ádebıetterdi ózderi alyp, belgili ýaqytta qaıtara alady. О́z-ózine qyzmet kórsetý termınalynda ózin ózi sáıkestendirý pýnkti, kópfýnksııaly aımaqtar, stasıonarlyq bakterısıdti shamdar, aqparattyq resýrstar ornatylǵan.
Shyǵys Qazaqstan oblysy