Nur-Sultan qalasynyń ákimdigi bıyl elordada qoǵamdyq kólik salasynda qandaı jumystar júrgizilgenin, jyl basynan beri qansha kóshede avtobýs jolaqtary engizilgenin, qansha jańa baǵyt iske qosylǵanyn aıtyp berdi, dep habarlaıdy Egemen.kz.
2019 jyly Nur-Sultanǵa 100 elektrobýs satyp alyndy. Kelesi jyly taǵy 100 elektroavtobýs satyp alý josparlanýda.
2021 jyldyń basynan beri elordada bes jańa baǵyt iske qosyldy. Onyń ishinde: №30 («О́ndiris» - Greenline); № 45 («Úrker» – Alash tas joly); № 69 (Qalalyq zırat - Aqan Seri kóshesi («Rahmet» SÚ); №26 («Agrogorodok» t/a – «Qazaqstan» TK); №323 («Lesnaıa Polıana» t/a – Nazarbaev Ýnıversıteti).
Qazir qalada 94 marshrýt júredi. Halyq arasynda №46, 51, 10, 9, 40, 37, 24, 56 baǵyttary joǵary suranysqa ıe.
Jyl basynan beri qalanyń jalpy jolaýshylar aǵyny 143 mıllıonnan astam sapardy qurady.
Qoǵamdyq kóliktegi epıdemıologııalyq jaǵdaıǵa baılanysty jolaýshylar densaýlyǵynyń qaýipsizdigi úshin maska rejımi engizildi. Avtobýs salondarynda antıseptıkter ornatylǵan. Árbir avtobýs sońǵy aıaldamaǵa kelgende salon mindetti túrde dezınfeksııalyq eritindimen óńdeledi, sondaı-aq aýysymnan keıin tolyq dezınfeksııa júrgiziledi.
Búginde elordada jalpy uzyndyǵy 73,6 shaqyrym bolatyn 26 kóshe ýchaskesinde Bus Lane iske qosyldy. Bıylǵy jyly bólingen Bus Lane jolaqtary kósheniń 8 ýchaskesinde paıdalanýǵa berildi. Olar Turan, Qabanbaı batyr, Uly Dala, Baıtursynov, Nájimedenov, Túrkistan, Abylaı han (qarbalas kezinde) jáne Muhamedhanov dańǵyldary men kósheleri.
Qalada barlyǵy 6 avtobýs parki bar, onyń ishinde 5 - jeke, 1 - kommýnaldyq. Kún saıyn jelige 869 birlik avtobýs shyǵady. Tańerteńgi jáne keshki saǵattarda jyljymaly quramnyń maksımaldy sany jelige shyǵarylady.
Aıta ketsek, júrgizýshiler men kontrollerler «CTS biliktilik ortalyǵynda» biliktilikti arttyrý kýrstarynan ótedi. Tipti jumysqa qabyldaý kezinde júrgizýshiler mindetti túrde CTS kólik mamandarynyń biliktilik ortalyǵynda oqýdan ótedi.