Qazaqstannyń Tuńǵysh Prezıdenti Nursultan Nazarbaev el Prezıdenti Qasym-Jomart Toqaevty qoldap, onyń bastamasy boıynsha jumys isteýge shaqyrdy, dep habarlaıdy Egemen.kz.
«Burynǵydaı biriksek, birge bolamyz, bárin jeńemiz. Qazaqtar birikse, jeńilmeıtin jaý joq ekenin tarıhtan bilesiz. Sondyqtan Prezıdentimizdi qoldasaq, onyń bastamalaryn qolǵa alsaq, bolashaqta tabysqa jetemiz», dedi Nazarbaev Táýelsizdiktiń 30 jyldyǵyna arnalǵan Nur-Sultandaǵy saltanatty is-sharada.
Elbasy Táýelsizdiktiń 30 jyldyǵy Qazaqstannyń qurylý tarıhyndaǵy taǵy bir mańyzdy kezeń ekenin aıtty.
«Biz áli de elimiz damyp kele jatqan uzaq joldyń basynda turmyz dep sanaımyn. Máńgilikke umtylǵan, asqaq armanǵa shaqyrǵan alys saparymyz sátti bolyp, ata-baba rýhy barshamyzdy qoldap, qut-bereke serik bolsyn. 21 ǵasyr Qazaqstannyń altyn ǵasyryna aınalsyn», dep túıindedi sózin Nursultan Nazarbaev.