Jer baýyrlaı aǵyndaǵan búrkit sur qoıandy tegeýrinimen ile qondy. Qyr basyndaǵy tóbeden qalbalaqtap, ańshy jetkenshe, jembasarymen basyp otyrǵan oljany julmalap jibergen.
Ulan aýdany, Bozanbaı aýylynyń ór jaǵynda ótken bul jarysqa 13 búrkitshi qatysty. Saptama etik, túlki tymaq kıip, búrkit kótergen olar Ulan jerinde tuńǵysh ret bas qosyp, qus ushyrdy. Táýelsizdiktiń 30 jyldyǵyna oraı «30 juldyzdy kún» jobasy aıasynda uıymdastyrylǵan búrkitshiler baıqaýy budan bylaı Bozanbaıda dástúrli túrde ótip turmaq. Nege Bozanbaıda deımiz ǵoı. Sóıtsek, munda bekzat ónerdi berik ustanǵan О́zbek Manapov degen búrkitshi ótken eken. Aýyldastary onyń ańshylyǵyn, saıatshylyǵyn jyr qylyp aıtyp otyrady. Ol bir dep qoıaıyq. Ekinshiden, Bes kóldiń irgesindegi Bozanbaı aýylyna qysy-jazy at shaldyratyn týrıster kóp. Eger búrkitshiler baıqaýy ótip tursa, týrısterdiń legi arta túsedi. Búgingi jarystyń ózin sonaý Iаmaıkanyń turǵynyna deıin kelip qyzyqtady. Tórt jyldan beri О́skemendegi Nazarbaev zııatkerlik mektebinde sabaq berip júrgen ol zeńgir kókte qalyqtap júretin búrkitti jaqynnan birinshi ret kóripti. Aspan taǵysyn qolǵa úıretken qazaq erekshe halyq dep tańdanady.
– Qazaq halqymen jaqyn aralasyp kettim. Salt-dástúrlerinen de habarym bar. Biraq búrkitti qolǵa úıretý, onymen ań aýlaý degendi birinshi ret kórdim. Ǵajap! Tańdanysymdy sózben jetkize almaı turmyn, – deıdi ıamaıkalyq Jannet.
Qyr basyndaǵy tóbeden qus salyp júrgen jeteý Úrjar aýdanynan kelse, qalǵany – jergilikti ulandyqtar. Saıys qorytyndysy boıynsha Úrjar aýdanynan kelgen Yryzdyq Qaseıin bas báıgeni qanjyǵasyna baılady. Ekinshi orynǵa jas qusbegi О́mirbek Nuǵman jaıǵassa, Aıtqurman Qaıdar úshinshi orynǵa ıe boldy.
Jeńimpazdar men qatysýshylarǵa aýdan ákimi atynan madaqtama hattar tabystalyp, júldegerlerge ulandyq azamattardyń demeýshiligimen aqshalaı syıaqy berildi. Aýdanda alǵash ret qolǵa alynǵan baıqaýǵa búrkitshiler de óz rızashylyqtaryn bildirdi. Bekzat ónerge jan-jaqty qoldaý kórsetilip jatqanyna bári bek rıza.
Men qazaqpyn, aqjúrek ańqyldaǵan,
Kóńili jomart, nıeti aq, sarqylmaǵan.
Jer betine tarydaı shashylsam da,
Saqtap keldim dalamdaı
dańqymdy aman,
– dep saıys sońynda belgili búrkitshi, atbegi, aqyn Táttimbet Kápuly búrkit qondyrǵan qolyn erdiń qasyna qoıyp turyp óleń oqydy.
Uly dalamyzdyń Ulandaı jerinde ótken sharadan el rýhtanyp, arqalanyp tarqasty. Iá, bul kúni kúmbirlegen kúı de tógildi, óleń de oqyldy. Bozanbaıdyń kók aspanynda qyrannyń sańqyly estildi. «Táýelsizdigimiz máńgilik bolsyn!» dep aqsaqaldar bata beristi.
Shyǵys Qazaqstan oblysy,
Ulan aýdany,
Bozanbaı aýyly