Birinshi jartylaı orta salmaqta judyryqtasatyn qazaqstandyq boksshy Batyr Júkembaev (19-1, 15 KO) óziniń kezekti jekpe-jegin ótkizip, qarsylasyn birinshi raýndta-aq sulatyp saldy.
Kanadanyń Monreal qalasynda ótken aıqasta Júkembaev boks jankúıerlerine asa qatty tanymal bolmasa da, óte tájirıbeli meksıkalyq Hýan Hose Martınes Alvarespen judyryqtasty. Martınes kásibı sharshy alańda 38 jekpe-jek ótkizip, sonyń 28-inde jeńiske jetken. 20 márte kezdesýdi merziminen buryn aıaqtaǵan. 10 aıqasynda qarsylasyna jol bergen.
Jekpe-jekti otandasymyz óte qarqyndy bastady. Á degennen qarsylasyn soqqynyń astyna alǵan Júkembaev 40 sekýndta Alvaresti nokdaýnǵa túsirip úlgerdi. Artynsha Martınes taǵy birneshe márte aýyr soqqy alǵan soń tóreshi kezdesýdi toqtatýǵa májbúr boldy. Sóıtip jerlesimiz meksıkalyq boksshydan 69 sekýndta-aq basym tústi.
Bul – Batyr Júkembaevtyń karerasyndaǵy 18-shi jeńisi. Kásipqoı bokstaǵy karerasyn osy Kanadada bastaǵan otandasymyz buǵan deıingi bir jekpe-jegin AQSh-ta ótkizip, tuńǵysh ret jeńilistiń kermek dámin tatýǵa májbúr bolyp edi. Endi, mine, Kanadaǵa qaıta oralyp, jeńisti jolyn jalǵady.