Elordada «Nur Álem» sferasynyń aldyndaǵy alańda elimizdiń jańa jyldyq bas shyrshasynyń shamyn jaǵý rásimi ótti. 25 metrlik shyrsha qala turǵyndary men qonaqtarynyń qýanyshyna aınaldy, dep habarlaıdy Egemen.kz.
Bıiktigi 25 metr bolatyn shyrshanyń dıametri 10 metrge jetedi. Al salmaǵy – 4048 kg.
Shyrsha shamdaryn jaǵý rásimine Aıaz ata men Aqshaqar, sportta, oqýda, shyǵarmashylyqta jetistikke jetken elordadyq jasóspirimder qatysty.
Shyrshaǵa bir sátte 1600-den astam jańa jyldyq sharlar, 300-ge jýyq úlken jáne kishkentaı aq ulpalar ilindi.
«Búgin keremet mereke, ásirese balalar úshin. Otbasymyzben birge qaladaǵy eń úlken shyrshany kórýge, konkı tebýge jáne taza aýada demalýǵa keldik. Onyń ústine aýa raıy óte qolaıly bolyp tur», – dep qala turǵyny Anastasııa alǵan áserimen bólisti.
«Biz osy mańǵa jaqyn jerde turamyz. Serýendep júrip, jurttyń aqyryndap jınalyp jatqanyn kórdik. Kóp uzamaı shyrshanyń shamy jaǵylyp, merekelik konsert qoıyldy. Mundaı kóńil-kúı jańa jyldyń jaqyndaǵanyn eriksiz eske salady», dedi elordalyq Merýert Qaıypova.
Kesh qonaqtary úshin qazaqstandyq estrada juldyzdary, onyń ishinde Rınat Malsagov, Marjan Arapbaeva, balalar hory jáne t.b. óner kórsetti.
Aıta ketý kerek, elordanyń barlyq aýdanynda muz qalashyqtar, jańa jyldyq shyrshalar, Aıaz Ata men Aqshaqar, aqqala jáne ózge de atrıbýttar ornatyldy.