QR Premer-Mınıstri Asqar Mamın Máskeý qalasyna jumys sapary aıasynda RF Úkimetiniń Tóraǵasy Mıhaıl Mıshýstınmen, sondaı-aq Reseıdiń memlekettik kompanııalary men qarjy-bank qurylymdarynyń basshylyǵymen kelissózder júrgizdi, dep habarlaıdy Egemen.kz QR Premer-Mınıstriniń baspasóz qyzmetine silteme jasap.
RF Úkimetiniń úılestirý ortalyǵynda A. Mamın men M. Mıshýstın saýda-ekonomıka, qarjy-ınvestısııa, tranzıttik-kólik, aýyl sharýashylyǵy, munaı-gaz hımııasy, energetıka, ǵarysh salalaryndaǵy Qazaqstan-Reseı yntymaqtastyǵyn odan ári arttyrýdyń perspektıvalaryn, sondaı-aq ónerkásiptik kooperasııa sheńberindegi jobalardy talqylady.
Eýrazııalyq ekonomıkalyq odaq formatyndaǵy ózara is-qımyldyń ózekti máseleleri, sondaı-aq COVID-19 taralýyna qarsy kúres jáne QR men RF ekonomıkalary úshin pandemııa saldaryn joıý jónindegi birlesken sharalar qaraldy.
A. Mamın eki eldiń ulttyq ekonomıkalaryn belsendi qalpyna keltirý aıasynda Qazaqstan men Reseı arasyndaǵy saýda-ekonomıkalyq qatynastar men ınvestısııalyq yntymaqtastyqtyń damýynyń joǵary dınamıkasyn atap ótti.
Osy jyldyń 10 aıynyń qorytyndysy boıynsha QR men RF arasyndaǵy saýda kólemi 30%-ǵa artyp, $19,5 mlrd-qa jetti. Bul rette saýda qurylymyn ártaraptandyrýda ilgerileýshilik baıqalady – Qazaqstannyń eksport kólemi 39,4%-ǵa, onyń ishinde óńdelgen ónimde 47,7%-ǵa ósti. Eksport qurylymynda munaı-hımııa salasynyń (+18,6%), mashına jasaý (+21,9%), hımııa (+33,1%) jáne jeńil (+27,1%) ónerkásip ónimi ulǵaıdy. Pandemııaǵa deıingi 2019 jylmen salystyrǵanda saýda kólemi 21%-dan astamǵa ósti.
2021 jyldyń birinshi jartysynda RF-nyń QR ekonomıkasyna tikeleı ınvestısııalarynyń kólemi 17%-ǵa artyp, $704,9 mln qurady. О́nerkásiptik kooperasııa salasynda mashına jasaý, metallýrgııa, hımııa ónerkásibi jáne t. b. salalarda $1,8 mlrd somasyna 9 birlesken iri joba iske asyrylyp jatyr. $2,8 mlrd somasyna 9 joba pysyqtaý satysynda tur.
Bıylǵy 11 aıda Qazaqstan men Reseı arqyly Ortalyq Azııa, Eýropa, Qıyr Shyǵys baǵyttarynda 733,2 myń JFE tasymaldandy, bul 2020 jyldyń sáıkes kezeńindegi kórsetkishten 30,7%-ǵa artyq. Qytaı – Eýropa – Qytaı baǵytyndaǵy tranzıttik konteınerlik tasymaldar kólemi 602,2 myń JFE (+31%) qurady.
Eki eldiń qorshaǵan ortany qorǵaý jáne tabıǵı resýrstardy utymdy paıdalaný salasyndaǵy yntymaqtastyǵy qaraldy. QR ekologııa, geologııa jáne tabıǵı resýrstar mınıstri Serikqalı Brekeshev pen RF tabıǵı resýrstar jáne ekologııa mınıstri Aleksandr Kozlovtyń baıandamalary tyńdaldy. Jaıyq jáne Ertis transshekaralyq ózenderi basseınderiniń ekojúıelerin saqtaý jónindegi baǵdarlamalar aıasynda jumysty sınhrondaý máselelerine erekshe nazar aýdaryldy.
Kelissózder qorytyndysy boıynsha «Batys Eýropa – Batys Qytaı» halyqaralyq kólik marshrýtynda motor otyny retinde tabıǵı gazdy paıdalanýdyń óndiristik-ótkizý ınfraqurylymyn damytý salasyndaǵy yntymaqtastyq týraly memorandýmǵa, atalǵan kólik dálizi men «Merıdıan» avtomobıl jolynyń avtojol ınfraqurylymyn damytý jónindegi 2021-2030 jyldarǵa arnalǵan birlesken is-qımyl josparyna qol qoıyldy.
Qazaqstan-Reseı memlekettik shekarasy arqyly avtomobıl ótkizý pýnktterin damytýdyń 2021-2025 jyldarǵa arnalǵan jol kartasy qabyldandy.
«QazTrade» AQ» eksportty ilgeriletý jónindegi qazaqstandyq operator «Reseı eksporttyq ortalyǵy» AQ-men jáne Ozon marketpleısimen yntymaqtastyq týraly memorandýmdar jasasty.
A. Mamın jumys sapary aıasynda «Skolkovo» qorynyń tóraǵasy Arkadıı Dvorkovıchpen, «Sberbank» JAQ basqarma tóraǵasy German Grefpen, «RTJ» AAQ basqarma tóraǵasy Oleg Belozerovpen eki eldiń sıfrlyq, qarjy-bank jáne temirjol salalaryndaǵy ózara is-qımylynyń ózekti máselelerin talqylady.
Reseı tikeleı ınvestısııalar qorynyń bas dırektory Kırıll Dmıtrıevpen kezdesýde ınvestısııalyq yntymaqtastyqtyń jáne óńdeý ónerkásibindegi (farmasevtıka, mashına jasaý, metall óńdeý, hımııa ónerkásibi jáne t. b.) birlesken jobalardy iske asyrýdyń jaı-kúıi men perspektıvalary, sondaı-aq ekijaqty formatta jáne EAEO sheńberinde saýdany keńeıtý máseleleri qaraldy.
«Roskosmos» memlekettik korporasııasynyń bas dırektory Dmıtrıı Rogozınmen kezdesýde ǵarysh salasyndaǵy yntymaqtastyq jobalary talqylandy.
Jumys saparyna Strategııalyq josparlaý jáne reformalar agenttiginiń tóraǵasy – AHQO basqarýshysy Qaırat Kelimbetov, QR-nyń RF-daǵy elshisi Ermek Kósherbaev, saýda jáne ıntegrasııa mınıstri Baqyt Sultanov, energetıka mınıstri Maǵzum Myrzaǵalıev, ekologııa, geologııa jáne tabıǵı resýrstar mınıstri Serikqalı Brekeshev, sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın, ındýstrııa jáne ınfraqurylymdyq damý vıse-mınıstri Berik Qamalıev, Aqtóbe oblysynyń ákimi Ońdasyn Orazalın, Batys Qazaqstan oblysynyń ákimi Ǵalı Esqalıev jáne t. b. qatysty.