Táýelsizdik kúni, ıaǵnı 16 jeltoqsanda Túrkistan oblysynda 190 sábı dúnıege keldi. Onyń 96-ysy ul bolsa, 94-i – qyz bala. Oblystyq qoǵamdyq densaýlyq basqarmasynyń habarlaýynsha, búginde náresteler men analardyń jaǵdaıy jaqsy. Mereke kúnderi kezekshi aýysymda joǵary bilikti dárigerler, tájirıbeli akýsherler men medbıkeler náreste men anaǵa kútim jasaǵan.
Elimizde bala týý kórsetkishi boıynsha kósh bastap turǵan oblysta mektep qurylysy qarqyndy júrgizilýde. Mysaly, bıyl bastalǵan 78 mekteptiń qurylysyna memleket qazynasynan 18,2 mlrd teńge qaraldy. Onyń ishinde 2,3 mlrd teńge «Aýyl – el besigi» baǵdarlamasy arqyly, 15,9 mlrd teńge oblystyq bıýdjetten bólingen. Búginde 29 mekteptiń qurylysy aıaqtalyp, paıdalanýǵa berildi. Sonymen qatar bıyl 7 sport nysanynyń qurylys jumystaryn júrgizýge 7,4 mlrd teńge qaraldy. Al óńirde paıdalanýǵa beriletin turǵyn úıdiń jalpy alańy jyldyq jospar boıynsha 800 myń sharshy metrdi quramaq. Bıyl qańtar-qarasha aılarynda oblystaǵy qurylys jumystarynyń kólemi 252 mlrd teńge boldy.
Qurylys qarqynynyń bir nátıjeli kórinisi Táýelsizdiktiń 30 jyldyǵy merekesi qarsańynda Túrkistan qalasynda 40 otbasy baspanaly boldy. Jeltoqsan aıynyń sońyna deıin baspana kezeginde turǵandarǵa jalpy 610 páter beriledi. Túrkistan qalasynyń ákimi Nurbol Turashbekovtiń málimdeýinshe, olardyń barlyǵy – kópbalaly jáne áleýmettik jaǵynan álsiz toptaǵy otbasylar. Onyń ishinde, kópbalaly otbasyna – 470, álsiz toptaǵy otbasylarǵa 140 páter beriledi. Sondaı-aq oblys ortalyǵyndaǵy 14 kópqabatty turǵyn úıdiń 763 páteri «Otbasy bank» AQ arqyly jáne kópqabatty 3 turǵyn úıdiń 151 páteri «7-20-25» baǵdarlamasy arqyly nesıe júıesimen satylymǵa qoıyldy. Búginde munda bıýdjet esebinen 7, 9 jáne 12 qabatty 67 turǵyn úıdiń qurylysy júrýde. Sonymen birge jańa úılerdiń aýlalary abattandyrylyp, balalar alańqaılary salynýda.
Túrkistan oblysy