Almatyda Ábish Kekilbaevtyń povesi boıynsha túsirilgen «Shyńyraý» fılminiń tusaýkeseri ótti, dep jazady Egemen.kz.
Kınotýyndynyń qoıýshy rejısseri ári ssenarıı avtory Jańabek Jetirýov. Fılmdi QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirgen.
Ábish Kekilbaevtyń povesi «Shyńyraýdyń» jelisi boıynsha túsirilgen kartına qudyq qazýshy Eńseptiń oqıǵasyn baıandaı otyryp, menmendik, baqtalastyq, mahabbat, dostyq, qastandyq syndy adamǵa tán qubylystardy kóteredi.
«Osydan týra on jyl buryn, El táýelsizdiginiń 20 jyldyǵyna oraı Astana qalasynda Jańabek aǵamyz túsirgen, zamanymyzdyń zańǵar jazýshysy Ábish Kekilbaevtyń shyǵarmashylyq jolyna arnalǵan derekti fılmniń tusaýkeserin ótkizip edik. Endi mine, Ábish aǵamyzdyń povesi jelisimen túsirilgen tamasha kórkem fılmniń tusaýkeserine jınalyp otyrmyz. Árıne, pandemııa bolmasa, bul fılm talaı festıvalderde júldeli oryndardan kórinetin edi. Soǵan qaramastan, «Shyńyraý» fılmi 10-ǵa jýyq halyqaralyq bedeldi kınofestıvalge qatysyp, kórermen men kınosynshylardyń yqylasyna bólendi», dedi «Qazaqfılmniń» vıse-prezıdenti Aıdarhan Ádilbaev.
«Fılmniń tusaýkeserin 2019 jyly naýryz aıynda ótkizemiz dep josparlap edik, alaıda pandemııaǵa baılanysty basqa kúnge aýystyrýǵa týra keldi. Tipti bizdiń fılmdi alǵan keıbir festıvalder de ótkizilmeı qaldy. Búgingi tusaýkeserdi uıymdastyrýǵa qol ushyn sozǵan, «Qazaqfılmge» jáne qazaq óneri men mádenıetiniń mesenaty Jaýǵashty Nábıevke alǵysymdy bildiremin», dedi fılmniń rejısseri Jańabek Jetirýov.
«Bul povest 1982 jyly jazylǵan bolatyn. Kóptegen rejısserler túsiremiz dep úmittenip edi, nátıjesinde Jańabek aǵamyz qolǵa aldy. Ol kisi atamyzben birneshe ret kezdesip, ssenarıdiń alǵashqy nusqasyn ózine maquldatqan bolatyn. О́kinishke qaraı, atamyz fılmdi túsirý jumysy bastalǵanyn kórmeı ketti. 2019 jyly Astanada «Eýrazııa» halyqaralyq kınofestıvaliniń baǵdarlamasynda «Shyńyraý» fılmi alǵash ret kórsetildi», dedi jazýshynyń nemeresi Abyl Kekilbaev.
Esterińizge sala keteıik, fılmniń túsirilimi Mańǵystaý oblysynda ótti. Kartınada Qaraqııa oıysy, Ústirt shoqysy jáne Kaspıı teńizi kórinis tabady. Fılmdegi basty rólderdi Asylhan Tólepov, Aldabek Shalbaev jáne Aıjan Jetirý somdady.
Kınotýyndy Dakka qalasynda ótken 17-shi halyqaralyq festıval sheńberinde alǵash ret kórsetildi (Bangladesh, 2019). Bul festıvalde otandyq týyndy «Úzdik operatorlyq jumys» (operatory Rıvkat Ibragımov) júldesin jeńip alǵanyn aıta ketken jón. Sonymen qatar «Shyńyraý» fılmi 37-shi Halyqaralyq Fadjr kınofestıvaldiń (Iran, sáýir, 2019 j.), 28-shi Búkilqytaılyq «Altyn átesh jáne júz gúl» atty kınofestıvali (Qytaı, qarasha, 2019 j.), Asian International Film Festival Arizona kınofestıvaldiń (AQSh, jeltoqsan, 2019 j.), Kaaryat International Film Festival of India festıvaldiń (Úndistan, jeltoqsan, 2019 j.), 24-shi Halyqaralyq Kerala kınofestıvaldiń (Úndistan, jeltoqsan, 2019 j.), 13-shi halyqaralyq Sofia MENAR Film Festival (Bolgarııa, qańtar, 2021 j.) syndy basqa da kınofestıvalderdiń konkýrstyq baǵdarlamasyna qatysty.
Odan bólek, bul fılm 2019 jyly zańǵar jazýshy, kórnekti memleket jáne qoǵam qaıratkeri Ábish Kekilbaevtyń 80 jyldyǵyna oraı Máskeýde Qazaqstandyq kıno kúnderi aıasynda kórsetilgen bolatyn.