Shaıbaly hokkeıden Qazaqstan jastar quramasy (U-20) 2023 jyly Reseıdiń Novosibir men Omby qalasynda ótetin jastar arasyndaǵy álem chempıonatynyń elıtaly kezeńine shyǵa almady.
Danııada máresine jetken jahandyq dodanyń birinshi dıvızıonynda óner kórsetken jerlesterimiz óz tobynda tórtinshi orynǵa taban tiredi. A tobynda Danııa, Belarýs, Latvııa, Norvegııa jáne Majarstan quramalarymen elıtaly kezeńniń joldamasyn sarapqa saldy. Aleksandr Istomın jattyqtyratyn Qazaqstan jastar quramasy toptaǵy bes oıynnyń ekeýinde jeńiske jetip, úsh matchta qarsylastaryna ese jiberdi.
Jerlesterimiz álem birinshiligindegi tusaýkeser matchyn sátti bastap, Majarstan quramasyn 3:1 esebimen qapy qaldyrǵan bolatyn. Alaıda keıingi oıynda Norvegııadan utylyp qaldy – 2:5. Al úshinshi týrda jarys qojaıyndary Danııany 4:1 nátıjesimen jeńip, joǵary topqa joldama beretin múmkindikti saqtap qalyp edi. Alaıda sheshýshi eki oıynda Belarýs hokkeıshilerinen 2:4, Latvııadan 1:3 esebimen jeńilip, kelesi jyly da álem chempıonatynyń birinshi dıvızıonynda baq synaýǵa májbúr boldy.
Toptaǵy bes matchtyń beseýinde de qarsylastaryna soqyr upaı ustatpaǵan Belarýs hokkeıshileri birinshi orynmen (15 upaı) dúnıejúzilik dodanyń elıtaly kezeńine shyqty. V tobynda birinshi oryndy ıelengen Fransııa quramasy da kelesi jyly joǵary toptyń chempıonatynda oınaıtyn boldy.