Shymkentte 16 jastaǵy oqýshy qyz besinshi qabattaǵy terezeden qulap ketti. Ol shuǵyl túrde aýrýhanaǵa jetkizildi, biraq dárigerler qyzdy aman alyp qala almady, dep habarlaıdy Egemen.kz.
Bul týraly OTYRAR saıty jazady.
Qaıǵyly oqıǵa eki kún buryn Asar-2 yqshamaýdanynda tańǵy saǵat 11-de bolǵan. Marqumnyń kórshileriniń aıtýynsha, qyz meıirimdi jáne ádepti bolǵan. Sondyqtan onyń mundaı qadamǵa barýyna ne túrtki bolǵany beımálim. Jazataıym oqıǵa bolýy múmkin ekeni de joqqa shyǵarylmaıdy.
Dárigerlerdiń aıtýynsha, bıikten qulaǵan oqýshy qyz komaǵa túsken, kóp jaraqat alǵan. Dárigerler qyzdyń ómiri úshin 12 saǵat boıy kúreskenimen, nátıje bolmady.
«21 jeltoqsanda saǵat 11:15-te 2005 jyly týǵan qyz qaıtys boldy. Oǵan ashyq bas-mı jaraqaty, bas-mı kontýzııasy, bassúıek ishilik gematoma, mıdyń isinýi, jabyq yǵysqan lob-ıhıaldy synyq, eki ókshesiniń ashyq synyǵy, ish qýysy jaraqaty jáne aýyr travmatıkalyq shok dıagnozy qoıldy», dedi Shymkent qalalyq densaýlyq saqtaý basqarmasynyń baspasóz hatshysy Laýra Nahıpova.
Polısııa qylmystyq is qozǵady.
«Derekti Qarataý aýdanynyń polısııa bóliminiń qyzmetkerleri QR Qylmystyq kodeksiniń 105-babynyń 3-bóligi («Kámeletke tolmaǵan adamǵa qatysty óz-ózine qol jumsaýǵa aparý») boıynsha TJD tirkeýge aldy. Qazirgi ýaqytta sotaldy tergeý amaldary júrgizilip jatyr. Is boıynsha sot tergeýi júrgizilip jatyr. QR Qylmystyq-prosestik kodeksiniń 201-babyna sáıkes tergeý múddesi úshin basqa málimet jarııa etýge jatpaıdy», dedi Shymkent qalalyq IIB bólimshesiniń ishki jáne syrtqy kommýnıkasııalar bóliminiń basshysy Móldir Bekeeva.
Endi polıseıler bul sýısıd pe, álde oqys oqıǵa ma, anyqtaýy kerek.
Beıresmı málimet boıynsha, tótenshe jaǵdaı kezinde páterde qyzdyń synyptastary bolǵan. Osyǵan baılanysty áke men qyzy arasynda janjal týyndaǵan. Ol kezde qyzdyń anasy basqa qalada jumysta bolǵan.