О́skemendegi №2 sottyń baspasóz qyzmeti «Jetim balalar men ata-anasynyń qamqorlyǵynsyz qalǵan balalarǵa arnalǵan oblystyq arnaıy mektep-ınternat» KMM dırektoryna qatysty asa iri kólemde bıýdjet qarajatyn jymqyrdy degen kúdikpen qylmystyq is qaralǵanyn habarlady, dep jazady Egemen.kz.
Tergeý amaldarynyń qorytyndysy boıynsha, 2013-2019 jyldar aralyǵynda dırektor qyzmetin atqarǵan sottalýshy jalpy somasy 12 830 996 teńgege senip tapsyrylǵan bóten múlikti urlap ketken.
Jábirlenýshi ókiliniń, kýágerlerdiń aıǵaqtary, býhgalterlik qujattar men saraptama qorytyndysy kúdiktiniń kinásin rastady.
Alaıda, sottalýshy kinásin moıyndamady. Burynǵy dırektor men onyń advokaty aqtaý úkimin shyǵaryp, isti toqtatýdy surady.
Prokýror qylmyskerdi 9 jylǵa bas bostandyǵynan aıyrýdy talap etti, biraq sot bul máselede aıyptalýshynyń balalary bar ekenin nazarǵa aldy.
«Qylmystyq quqyq buzýshylyqty alǵash ret jasaýdy, kámeletke tolmaǵan balanyń bolýyn, aýyrlatatyn mán-jaılardyń bolmaýyn, ári zalaldyń ótelmegenin eskere otyryp, sot memlekettik qyzmette qyzmet atqarý quqyǵynan ómir boıyna aıyra otyryp, 7 jyl bas bostandyǵynan aıyrý túrindegi jaza taǵaıyndady», dep habarlady № 2 sotta.
Úkim zańdy kúshine engen joq.