Qostanaı qalasynyń turǵyny Davıd Asanov sadhý taqtaıynyń ústinde tapjylmaı uzaq turýdan jeke rekordyn ornatty. Sadhý taqtaıy dep otyrǵanymyz – kádimgi úshkir temir shegeler qaǵylǵan tórt buryshty jup taqtaı.
26 jastaǵy qostanaılyq 20 jeltoqsanda «Qostanaı-Plaza» saýda ortalyǵynyń birinshi qabatyndaǵy ashyq dálizde shegeniń ústinde 4 saǵat boıy jalańaıaq turdy. Atalǵan is-sharaǵa Almaty qalasynan arnaıy kelgen Darıa Ivshına da qatysty. Ekeýi shegeniń ústine saǵat 10-nan 42 mınýt ketkende shyqty.
Davıd osydan 3 jyl buryn Chelıabide bir aılyq kishi medısına mamany kýrsynda oqyp júrip, sadhý taqtaıyn jasaıtyn kásiporynǵa ýaqytsha jumysqa kiripti.
– Shege qaǵylǵan taqtaıdyń ústine eń alǵash sol jerde turyp kórdim. Keıin Qostanaıǵa oralǵan soń ári qaraı damyta bastadym. 2019 jyly tuńǵysh ret saýda oryndarynyń birine baryp kópshiliktiń aldyna shyǵyp, bir saǵat jeke rekordyma qol jetkizdim. Bul joly 7 saǵattan kem turmaýǵa bekinip keldim, – dedi Davıd.
D.Asanovtyń sózine qaraǵanda, shegeniń ústinde jalańaıaq turý medıtasııa, psıhologııamen tyǵyz baılanysty óner eken. Muny fıtnes baǵyttarynyń biri – bulshyq etti sozyp, adamdy ıkemdi bolýǵa beıimdeıtin stretchıng jattyqtyrýshysy bolyp jumys istep júrgen Darıa Ivshına da rastaıdy.
– Shegede turýǵa úıretetin arnaıy mektepter bar. Jalpy, adamnyń jeti denesi bar, onyń altaýy óte juqa bolady, qalyńy jetinshisi – fızıkalyq dene. Shegeniń ústine shyqqan adamnyń mentaldy, emosıonaldy jáne fızıkalyq dep atalatyn úsh denesi shynyǵady. Mentaldy dene degenimiz bizdiń basymyzda toqtaýsyz júrip jatatyn oı-qııalymyz. Osylardyń nátıjesinde emosıonaldy nemese efırli dene paıda bolady. Iаǵnı adamnyń ishki kúızelis-qýanyshynan turatyn jaǵymdy nemese jaǵymsyz emosııa qalyptasady. Emosııa bolyp bekigen oı denege turaqtaıdy. Tán munyń bárin jazyp alady. Osy jazylyp qalǵan nárseni ýaqtyly syrtqa shyǵaryp otyrmasaq, munyń sońy aýrýǵa, júıke dertine, kúızeliske ákep soqtyrýy múmkin. Adam osylaısha, ózimen ózi tanysýdy, óziniń ishki álemin tanýdy úırenedi. Bizdiń betperdemiz basqa da, ishki menimiz múlde basqa bolyp shyǵýy múmkin. Qoldan kelgenshe, osy ekeýin úılestire bilý kerek, – dedi Darıa.
D.Ivshına 2 saǵat 22 mınýttan keıin shegeden tústi. Al Davıd 4 saǵatqa deıin shydap turdy. Alaıda Qazaqstan Rekordtar kitabynyń ókili Baqytjan Tastúlekovke habarlasyp kórip edik, ol kisi qostanaılyq úmitkerdiń bul eńbegi resmı rekord retinde tirkelmeıtinin aıtty.
– Qazaqstan rekordtar kitabynyń erejesi boıynsha adamnyń densaýlyǵyna zaqym keltiretin rekord bolsa, biz ony tirkemeımiz. Máselen, úshkir shegeniń ústinde turyp tabany jaraqattansa, adamnyń denesine de zaqym kelgeni ǵoı. Biz adamnyń rýhyn kóteretin, bıik jeńisterge jeteleıtin rekordtardy ǵana tirkeımiz. Kitaptyń 20 shaqty adamnan quralǵan redaksııalyq alqasy bar. Olar óz sózin aıtady. Davıd Asanov maǵan óziniń rekordyn WhatsApp arqyly jibergennen keıin, men ony redaksııa alqasynyń chatyna salyp jibergem. Biraq olar maquldaı qoımady. О́ıtkeni biz buǵan deıin osyǵan uqsas densaýlyqqa qaýipti bir-eki rekordty tirkegenbiz. Osydan keıin jurttar ártúrli rekordtardy oılap taýyp, ne bolsa, sony usynyp jatyr. Olarǵa qoı demesek, bul jaqsy úrdis emes. Sondyqtan biz bul rekordty tirkegen joqpyz, – dedi Baqytjan Tastúlekov.
Al D.Asanov aldaǵy jyldyń kúzine deıin daıyndyǵyn pisirip alyp, qyrkúıek aıynda taǵy bir baq synap kórmek.