Qazaq tarıhynda Tóle bı, Qazybek bı jáne Áıteke bı sııaqty tulǵalardyń ónegeli ómiri, el úshin etken eńbegi eren. Týralyqtyń, ádildiktiń jarshysy retinde de belgili.
El basyna aýyrtpalyq túsken kezeńderde de ulttyń úsh báıteregi halyqqa qorǵan bola bildi. Uly tulǵalardy ulyqtaý maqsatynda el Táýelsizdiginiń 30 jyldyǵyna oraı, Taraz qalasynda úsh bıdiń eskertkishi ashyldy. Alyp eskertkish Jambyl oblystyq soty ǵımaratynyń aldynda ornalasqan.
Eskertkishtiń ashylý saltanatyna oblys ákimi Berdibek Saparbaev, sot salasynyń ardagerleri men oblystyq sot tóraǵasy Erbol Ahmetjanov qatysty. Jıynda Erbol Ahmetjanov pen ardager Musabek Turǵanbekuly eń kúrdeli kezeńde qazaqtardy biriktirýde sheshýshi ról atqaryp, eldiń erkindigi men táýelsizdigi úshin kúresken uly bılerdiń ónegeli ómir jolyna toqtaldy. «Qazaq bıleriniń ədil sot isin damytýǵa jəne nyǵaıtýǵa qosqan úlesi ólsheýsiz. Tóle bı, Qazybek bı, Áıteke bıdiń qazaq halqynyń qalyptasýyna ólsheýsiz úles qosqanyn, eńbekteriniń sot tóreligimen tyǵyz baılanysty bolǵanyn atap ótkenimiz abzal. Eskertkish danalyq pen ádildiktiń nyshany», dedi Musabek Turǵanbekuly. О́z sózinde Berdibek Saparbaev ár zamannyń ózine saı sot júıesi bolǵanyn, kezindegi Bıler keńesi sonyń aıǵaǵy ekendigin, Tóle bı, Áıteke bı, Qazybek bı esimderi qazaq memlekettiligi men qazaq sot tóreligi negizimen tyǵyz baılanysty ekenin atap ótti. Budan keıin kelýshiler úsh bıdiń eńseli eskertkishine gúl shoqtaryn qoıyp, babalar rýhyna taǵzym etti.
Kóne shaharda boı kótergen jańa eskertkish betonnan quıylyp, mármár tuǵyrǵa ornatylǵan. Monýment avtory – tanymal músinshi Temirhan Qoljigit. Eskertkishtiń bıiktigi 3,50 metrdi quraıdy.
Jambyl oblysy