«Qazaqstan RTRK» AQ Balapan telearnasy Qazaqstan Respýblıkasy Táýelsizdiginiń 30 jyldyǵyna túrli janrdaǵy 10 jańa týyndy ázirledi. Jobalar egemen eldiń tarıhy men mádenıeti, ǵylymy men bilimi, belesteri jáne tabystary týraly qyzyqty derekterdi qamtyǵan ári bala paıymyna laıyqtalǵan.
Olardyń 8-i anımasııalyq joba bolsa, 2-i tanymdyq baǵdarlama. Balapannyń kórermenderi «Sultan Beıbarys» (3D) mýlthıkaıasynan bahadúr Beıbarystyń balalyq shaǵynan Mysyr Sultany bolǵanǵa deıingi ómirimen tanyssa, «Qaharmannan» (3D) túrkiler dáýirine saıahattap, babalarymyzdyń jankeshti erligin kóredi. Basty qundylyǵymyz –Táýelsizdigimizdi keler urpaqqa tabystaýdy negizgi ózek etken «Altyn kilt» (2D) anımasııalyq serıaly baldyrǵandardy otansúıgishtikke baýlysa, «Ǵaryshker bala Jiger» (2D) arqyly jas jetkinshekter Qazaqstannyń ǵarysh salasyndaǵy jetistikteri men Baıqońyr ǵarysh aılaǵy týraly qyzyq derekterdi biledi. Al «Sen bilesiń be?» tanymdyq baǵdarlamasy táýelsizdigimizdi alǵannan keıingi eleýli oqıǵalardy, tuǵyrly tulǵalardy tanı túsýge yqpal etedi.
Aldaǵy mereke kúnderi telearnadan oıyn-saýyq, oqý-tanymdyq mýlthıkaıalardy da tamashalaýǵa bolady. «Táp-tátti hıkaıada» (3D) Konfı men Alýa qorshaǵan ortany tanystyrsa, «Tompıdegi» (2D) Álı men Aısha zattardyń pishini men qasıetterin uǵyndyryp, mánin ashyp beredi. Telearna bıyl álemdik trendke aınalǵan komıks janryn da nazardan tys qaldyrmaǵan. Osylaısha, tuńǵysh ret ulttyq ereksheligimiz eskerilgen «Erjúrek saqshylar» (2D) atty komıks ázirlenip jatyr. Sonymen qatar batyrlar jyryn arqaý etken shytyrman oqıǵaly «Er Tarǵyn» (3D) mýltserıaly kórermenge usynyldy. Buǵan qosa, kishkentaı kórermender tanymdyq «Birge oınaıyq!» baǵdarlamasyn tamashalaı alady. Aıta ketelik, jyl basynan beri Balapan telearnasy jalpy 42 jobany júzege asyrdy. Telearna sonymen qatar, «Táýelsizdiktiń 30 jyldyǵyna – 30 tartý!» shyǵarmashylyq baıqaýyn uıymdastyrdy. Jyl boıy ótken bul baıqaýda kishkentaı kórermender azattyq týraly paıym-túsinigi men keleshek armandary jaıly aıtyp, óz ónerimen bólisti.
ALMATY