Túrmedegiler sany 2,5 esege azaıdy

Túzeý mekemelerinde qazirgi tańda 35 myńǵa jýyq adam bar. Onyń ishinde 30 myńy sot­talǵan jáne 4 myńy tergeý úshin qamaýǵa alynǵan, olardyń negizgi bóligi, ıaǵnı 93 paıyzy aýyr jáne asa aýyr qylmys úshin jazasyn óteıdi. Shamamen 40 paıyzy – buryn sottalǵandar.

Baspasóz konferensııa­syn­da Qazaqstannyń penıten­sıarlyq júıesiniń qyzmetin jetil­dirý máseleleri týraly baıan­da­ma ja­saǵan komıtet tór­aǵasy sot­tal­ǵandardy ustaý jaǵ­daılaryn jaqsartý úshin IIM penıtensıarlyq júıe­siniń ınfraqurylymyn jań­ǵyrtý jónindegi jol kartasy ázir­lengenin aıtty. Jol kartasy sheńberinde halyqaralyq standarttarǵa saı keletin 20 jańa mekeme salý kózdelip otyr. Bas­tapqy kezeńde 2022-2024 jyldary Almaty, Aqtóbe, Mańǵystaý jáne Túrkistan oblystarynda tórt mekeme salý josparlanǵan.

Sondaı-aq J.Eshmaǵam­betov­tiń málimdeýinshe, qylmystyq atqarý zańnamasyn jetildirý jónindegi is-sharalar iske asyrylýda. Má­selen, ótken jyly qylmystyq zańnamany jetil­dirý jáne jeke adamnyń quqyq­taryn qorǵaýdy kúsheıtý máse­leleri boıynsha zań sheńberinde sottalǵandardyń quqyqtyq jaǵ­daıyn jaqsartýǵa baǵyttalǵan ózgerister engizildi. «Úkimet qaýly­symen bekitilgen adam qu­qyqtary salasyndaǵy birinshi kezektegi is-sharalar josparyn iske asyrý kezinde qyl­mystyq sot tóreligi, jazany oryndaý, azaptaýdyń jáne qatygezdiktiń aldyn alý salasynda adam quqyqtaryn qamtamasyz etýge baǵyttalǵan zań jobasy ázir­lendi. Adam quqyqtary jó­­nindegi ýákildiń bastamasymen vedomstvoaralyq jumys toby quryldy, onyń quramyna ÚEU ókilderi, ulttyq jáne ha­lyqaralyq sarapshylar kirdi. Bul erejeler BUU maquldaǵan tutqyndarǵa qatysty eń tómengi standarttardy anyqtaıdy», deıdi komıtet tóraǵasy.

Alaıda komıtet basshy­sy túzeý mekemelerinde ortaq tártipke baǵynǵysy kel­meı­­tinderdiń bar ekenin de aıt­ty. «Jekelegen sottal­ǵan­­­dar jazany óteýdiń zań­na­mada belgilengen tártibin saq­tamaıdy, ákimshilikke qysym ja­saýdyń ártúrli aran­da­týshylyq tásilderin, onyń ishin­de azaptaýǵa qatysty jal­ǵan aryz-ótinish jasaı­tyndar da bar. Osyǵan qara­mastan, zor­lyq-zombylyq, qa­ýip-qater jáne ózge de zańsyz qatygez qa­rym-qatynas sharalary qol­danylǵany týraly árbir ha­barlama tótenshe jaǵdaı retinde qa­byldanady», deıdi ol. Mem­leket basshysynyń tapsyrmasy boıynsha qyzmetkerler men sot­talǵandardyń zańsyz is-áreket­terin baqylaý jáne aldyn alý maqsatynda barlyq penı­tensıarlyq mekemelerde beıne­baqylaý kameralary ornatylady. Bul prosess aldaǵy 3 jylda aıaqtalady dep josparlanǵan.

Jumysqa ornalastyrý – sottalǵandardy bostandyqtaǵy ómirge beıimdeý men túzeýdiń mańyzdy faktory. Jumysqa ornalastyrylǵandardyń sany ótken jyly 38 paıyz bolsa, bıyl 49 paıyzǵa jetken. Búginde jabyq mekemelerdegi óndiristik alańdarda 3,5 myńǵa jýyq adam eńbek etedi. Negizinen, tut­qyndar qurylys materıaldary, metall qurylymdary, aǵash jáne plas­tıkten jasalǵan buıymdardy óndirýge qatysady. Tigin óndirisi de jaqsy jolǵa qoıylǵan.