Ál-Farabı atyndaǵy Qazaq ulttyq ýnıversıtetinde Qazaqstan Respýblıkasynyń Memlekettik hatshysy Qyrymbek Kósherbaev «Kreatıvti ındýstrııany damytýdyń keleshegi» taqyrybynda jastarmen kezdesý ótkizdi.
Is-sharaǵa Premer-Mınıstrdiń orynbasary Eraly Toǵjanov, Bilim jáne ǵylym vıse-mınıstri Qýanysh Erǵalıev, Ulttyq ekonomıka vıse-mınıstri Álisher Ábdiqadyrov, Ál-Farabı atyndaǵy QazUÝ-dyń basqarma tóraǵasy – rektory Janseıit Túımebaev, kórnekti ǵalymdar, ýnıversıtettiń oqytýshy-professorlary, jas ǵalymdar men stýdentter qatysty.
Kezdesýde Qyrymbek Kósherbaev Memleket basshysy Qasym-Jomart Toqaevtyń kreatıvti ındýstrııany damytý maqsatynda bergen tapsyrmasyna sáıkes atqarylǵan jumystarǵa toqtaldy.
«Memleket basshysynyń tapsyrmasyna sáıkes bul baǵytta alǵashqy jumystar bastaldy. Úkimet kreatıvti ındýstrııany damytý boıynsha jobalyq keńse qurdy. Qarasha aıynda «2021-2025 jyldarǵa arnalǵan kreatıvti ındýstrııany damytý tujyrymdamasy» qabyldandy. Soǵan sáıkes, Nur-Sultan, Almaty jáne Shymkent qalalarynda bıznes-ınkýbatorlar, ortalyqtar men habtar qurý qarastyrylǵan. Almaty qalasynda qurylatyn bıznes-ınkýbatorǵa Ál-Farabı atyndaǵy Qazaq ulttyq ýnıversıteti negiz bolýy kerek dep esepteımin. Oǵan tolyq múmkindikter bar. Jalpy, kez kelgen qoǵamda kreatıvti ıdeıalardy týdyratyn orta – joǵary oqý oryndary men ondaǵy entýzıast jas ǵalymdar. Bul turǵyda Ál-Farabı atyndaǵy Qazaq ulttyq ýnıversıteti qazaqtyń ıntelektýaldy tarıhynda burynnan kóshbasshy», dedi Memlekettik hatshy.
Sonymen qatar Qyrymbek Kósherbaev stýdenttermen kezdesý barysynda kreatıvti ındýstrııany damytý úshin básekege qabiletti mamandardy daıarlaý qajettigin jetkizdi.
«Kreatıvti ındýstrııany damytý úshin kadr daıarlaý mańyzdy. Máselen, Batys elderinde aqyn-jazýshylardyń kitaptaryn jarnamalap, satý isimen ádebı agentter aınalysady. Sol sekildi bizdiń de qalamgerlerdiń týyndylaryn shet tilderine aýdaryp, naryqqa shyǵarýmen aınalysatyn bilikti mamandardy daıarlaý qajet. Budan bólek, sıfrly jańa tehnologııanyń qarqyndy damýy da jańa mamandyqtardyń, kýrstardyń ashylýyn mindettep otyr», dedi Qyrymbek Kósherbaev.
Memlekettik hatshy atap ótkendeı, qazir damyǵan elderde ekonomıkalyq ósimniń negizgi bóligi kreatıvti ındýstrııaǵa tıesili. Máselen, osy salaǵa jatatyn mádenı jáne shyǵarmashylyq ındýstrııa álem boıynsha jylyna 2,2 trln dollar qarjy taýyp, ekonomıkanyń ózge de salalaryn (týrızm, saýda, IT) damytýǵa septigin tıgizip otyr. Jastardyń (18-25 jas) negizgi bóligi atalǵan salalarda jumys isteıdi. Al Qazaqstan ekonomıkasyndaǵy kreatıvti ındýstrııanyń úles salmaǵy bar bolǵany 2,7%-y quraıdy (Ulybrıtanııada kreatıvti ındýstrııa IJО́-niń 14%-y). Bizde bul salalarda jumyspen qamtylǵan azamattardyń 3,5% ǵana jumys isteıdi (310 myń adam). Qyrymbek Eleýuly jastarǵa talant pen bıznesti ushtastyrý arqyly kreatıvti ındýstrııanyń damýyna silkinis jasaıtyn orta qalyptastyrý qajettigin basa aıtty.
Ál-Farabı atyndaǵy QazUÝ-dyń basqarma tóraǵasy – rektory Janseıit Túımebaev qurmetti qonaqtarǵa ýnıversıtetke kelip, kreatıvti ındýstrııany damytýǵa qoldaý kórsetkeni úshin rızashylyǵyn bildirdi. QazUÝ rektory kezdesýdiń ýnıversıtettiń talantty jastary úshin mańyzy zor ekenin atap aıtty. Kezdesý ashyq dıalog formatynda ótti. Stýdentter Memlekettik hatshy Qyrymbek Eleýulyna ózderin qyzyqtyrǵan suraqtaryn qoıyp, kreatıvti ındýstrııany damytý boıynsha jańa ıdeıalaryn ortaǵa saldy. Zań fakýltetiniń 1-kýrs doktoranty Aqerke Jaqysh kreatıvti ındýstrııany damytýǵa úles qosatyn jastar úshin jańa bilim berý baǵdarlamasyn iske qosý qajet ekenin atap ótti.
«Osy maqsatta kreatıvti salalar úshin damý qoryn qurý jáne ınvestısııalyq jáne qarjylyq saıasatta, salyq salýda, ımport pen eksportta belgili bir yntalandyrýlardy qoldaný qajet dep sanaımyz. Sondaı-aq kreatıvti ındýstrııanyń damýyna óz úlesin qosatyn jas talanttardy oqytý úshin jańa bilim berý baǵdarlamalaryn ázirleýdi usynamyz», dedi Aqerke Jaqysh.
Kezdesý aıasynda Memlekettik hatshy Qyrymbek Eleýuly bastaǵan delegasııa Ál-Farabı kitaphanasyndaǵy ýnıversıtet ǵalymdarynyń eńbekteri qoıylǵan ǵylymı jetistikter kórmesimen tanysty.
ALMATY