О́ńdeý ónerkásibi órkendegen Qostanaı qalasynda eksportqa joǵary sapaly ónim shyǵaratyn taǵy bir et kombınaty ashyldy. Beef export group dep atalatyn jańa kásiporyn jylyna 20 myń tonna et óńdep, odan shyǵatyn san túrli ónimder men jartylaı fabrıkattardy Qytaı, Pákistan, Birikken Arab Ámirlikterine, sondaı-aq Reseıdiń irgeles aımaqtaryna satatyn bolady.
«Jasyl» tehnologııaǵa negizdelgen jańa kásiporyndaǵy óndiristik jelilerdiń bári álemdik standarttar men sanıtarlyq talaptarǵa saı. Kombınattyń avtomattandyrylǵan qasaphanasynan bólek etti súıeginen ajyratyp, sińirinen sylyp alatyn derbes sehy, sorpalyq súıek alatyn, taza etti óńdeıtin, daıyn ónimdi oraıtyn, qaldyq óńdeıtin arnaıy sehtary bar. Shıki et pen daıyn ónimdi saqtaıtyn tońazytqysh bólmeleri de bólek ornalasqan. Zaýytqa ákelingen shıkizatty eń aldymen osyndaǵy zerthana mamandary veterınarlyq-sanıtarlyq saraptamadan ótkizedi.
Zamanaýı kásiporynnyń taǵy bir ereksheligi – mundaǵy óndiristik jeliler elektr qýaty men tabıǵı gazdyń kúshimen balamaly túrde jumys isteı beredi. Eń bastysy, munda baýyzdalǵan maldyń qanyn quıyp alý, óndiristik qaldyqtardy joıý sııaqty jumystardyń bárin aqyldy qurylǵylar atqarady. Tipti bıoqaldyqtarǵa deıin óńdelip, kádege jaratylady. Mundaǵy óndiriske «Halal» júıesi men ǴSS – as ónimderi qaýipsizdigi júıesi engizilgen.
– Ǵımarattyń, sehtardyń ishin tazartatyn qurylǵy da avtomatty túrde jumys isteıdi. Kásiporynnyń ózi qaladan 1 shaqyrym qashyq jerge ornalasqan. Munyń bári aınalamyzdyń lastanýyna jol bermeýge, qorshaǵan ortany taza ustaýǵa múmkindik beredi. Bizdiń kásiporyn emıssııa boıynsha 1 klasty qaýipsizdik talaptaryna sáıkes jumys isteıdi. Sonymen qatar biz oblys kólemindegi sharýashylyqtar men jeke turǵyndardyń da malyn soıyp, jiliktep bere alamyz, – dedi Beef export group seriktestiginiń dırektory Aleksandr Parhomenko.
Kásiporyn basshysynyń aıtýynsha, «Qarapaıym zattar ekonomıkasy» aıasynda qolǵa alynǵan aıtýly jobany iske asyrýǵa bas-aıaǵy 7,2 mlrd teńge jumsalǵan. Oblystyq aýylsharýashylyq basqarmasynyń mamandary jańa kombınat óńirde óndiriletin et ónimderiniń kólemin 30%-ǵa ulǵaıtýǵa múmkindik beredi dep otyr.
Et kombınatynda 250 adam jumys isteıdi. Mundaǵy avtomattandyrylǵan óndiristik jeli táýligine myń jarymnan astam iri qara etin óńdeı alady. Aldaǵy ýaqytta óndiristik qýatyn tolyq paıdalaný úshin kásiporyn jergilikti fermerlerdiń syrtynda, Aqmola, Soltústik Qazaqstan, Qaraǵandy oblystaryndaǵy sharýashylyqtardan mal satyp alýdy kózdep otyr.
Qostanaı oblysy