Alǵa aýdany Tamdy aýyldyq okrýgine qarasty «Erkin kúsh» aýylyna gaz qubyry tartyldy. Bul Aqtóbe oblysy boıynsha bıyldyqqa kógildir otyn jetkizilgen on besinshi aýyl. Bıylǵy jyldyń basynan beri 8 myńǵa jýyq turǵyny bar 14 eldi mekenge gaz qubyry jetkizilip, aýyl turǵyndarynyń beıneti azaıǵanyn aıta ketken jón. Osylaısha, Aqtóbe oblysy turǵyndarynyń 92,5%-y kógildir otynmen qamtylyp, gazdandyrý kórsetkishi boıynsha óńir elimizde besinshi orynǵa kóterildi. Al Nur Otan partııasynyń Jol kartasynda 2025 jylǵa deıin oblystyń 104 eldi mekenin gazben qamtý josparlanǵan.
«Bas merdiger «Teploenergostroı» JShS Tamdydan «Erkin kúshke» qaraı qubyr tartyp, jumysty eki aı shamasynda aıaqtady. Bul jobaǵa oblystyq bıýdjetten 50 mln teńge jumsaldy. Búginde Alǵa aýdany turǵyndarynyń 98,3 %-y kógildir otynǵa qol jetkizdi. Gaz qubyry ótkizilgennen keıin «Erkin kúshke» kóship kelýshiler kóbeıetin túri bar. Bul aýyl Aqtóbe qalasynan 50 shaqyrym jerde, «Aqtóbe-Atyraý» tasjolynyń boıynda ornalasqan. 500 turǵyny, bastaýysh mektebi bar. Aýyl ishinde 2 shaqyrym taratýshy jelileri júrgizildi. Kelesi jyly kórshiles Taldysaı aýylyna da gaz kelmek. Oǵan oblystyq bıýdjetten 70 mln bólindi. Sonda Alǵa aýdany boıynsha kógildir otyn jetkizilmegen jalǵyz aýyl – Jeruıyq eldi mekeni ǵana qaldy. Úshqudyq aýyldyq okrýginiń Jeruıyq aýylynda 250 adam turady. Osy aýylǵa kógildir otyn jetkizýdiń jobalyq-smetalyq qujattaryn ázirlep qoıdyq», deıdi Alǵa aýdanynyń ákimi Nurbol Erjanov.
Aqtóbe oblysynda gazdandyrý jobalary «Aýyl – el besigi» jobasy boıynsha qarjylandyrylýda. Oblystyq energetıka jáne turǵyn úı-kommýnaldyq sharýashylyq basqarmasynyń basshysy Erjan Muzdybaevtyń aıtýynsha, «Jeruıyq» jobasy merziminde aıaqtalsa, onda Alǵa aýdany oblystaǵy barlyq eldi mekenderi gazdandyrylǵan eń birinshi aýdan bolady. Odan keıingi kezekte Hromtaý aýdany tur. Hromtaý aýdanynyń Qudyqsaı eldi mekenine gaz qubyryn júrgizý aldaǵy sáýirde bastalmaq.
«Erkin kúsh» aýylyndaǵy gaz qubyrynyń berilý rásimine qatysqan óńir basshysy Ońdasyn Orazalınge Alǵa aýdanynyń Qurmetti azamaty, jasy 80-nen asqan áje, alty balanyń anasy Talan Eskeldına birneshe kósheniń jaryqtandyrylyp, aýyldyq okrýg ortalyǵy Tamdy eldi mekeniniń kóshelerine asfalt tóseý jumystary qarqyndy júrgizilip jatqanyna rızashylyǵyn bildirdi. «Bizdiń aýyldyń adamdary eńbekqor. Ár úıdiń aýlasynda óz qudyǵy bar, jurt mal baǵyp, egin egip, baý-baqsha ósiredi. Jaz boıy traktory bar adamdar shóp shaýyp, jan-jaqqa aparyp satady. Bul ózin-ózi asyrap otyrǵan aýyl», deıdi ol.
Aýyl turǵyny Albına Ońǵar óz otbasynyń kómir men aǵash satyp alýǵa jyl saıyn 200 myń teńge jumsaıtynyn, endigi jerde gazdyń tólemi kómir jaǵýǵa qaraǵanda arzanǵa túsetinin ári ot jaǵý men kúl shyǵarý beınetinen qutylatynyna rıza.
Osy saparymyzda Alǵa aýdany Besqospa aýyldyq okrýgine qarasty Eset batyr aýylyndaǵy medısınalyq ambýlatorııanyń ashylý rásimine qatystyq. «Aýyl – el besigi» baǵdarlamasy sheńberinde jergilikti bıýdjetten 121 mln teńgege qarjylandyrylyp, bas-aıaǵy 4 aıdyń ishinde salynǵan medısına mekemesi. Alǵa aýdandyq aýrýhanasynyń bas dárigeri Qanat Medeýbaev ambýlatorııaǵa bir dáriger, tórt medbıke shtaty bekitilgenin aıtty. Endigi jerde aýyl jurty kez kelgen dárigerlik kómek úshin aýdan ortalyǵyna shapqylamaıdy. Alǵadaǵy aýdandyq aýrýhananyń tis dárigeri aptasyna bir ret osynda kelip jurtqa qabyldaý júrgizedi. Qurylys júrgizgen merdiger emdeý mekemesin jıhazdarmen, medısınalyq qural-jabdyqtarmen tolyq jabdyqtaǵan. Osylaısha, 2 myń turǵyny bar Eset batyr aýyly turǵyndary Jańa jyl qarsańynda jańa medısınalyq mekemeniń jumysyn bastaǵanyna rıza.
Aqtóbe oblysy,
Alǵa aýdany