Qostanaı aýdanyna qarasty Jýkov eldi mekeninde turatyn 14 jastaǵy Kırıll Dýkart borandy kúni jylqy izdeýge shyǵyp ketip qaıta oralmaǵan. Aýyldan jaıaý shyqqan jasóspirimniń joǵalyp ketkeni týraly tosyn habar úshinshi qańtarda tústen keıin belgili boldy.
Tótenshe jaǵdaı departamenti men polısııa qyzmetkerleri Aleksandrov aýyldyq okrýginiń mańaıynda jedel izdestirý-qutqarý sharalaryn bastap, artynsha oǵan eriktiler jasaǵy qosyldy.
Qostanaı aýdany ákimdiginiń málimetinshe, joǵalǵan jasóspirimdi izdestirýge tótenshe jaǵdaı qyzmetiniń birneshe arnaıy tehnıkasy, iz kesýshi ıt ertken tórt kınolog maman, qar shanaǵa mingen eriktiler – barlyǵy 110 adam, 26 tehnıka qatysqan.
Izdeý sharalary toǵyz saǵatqa sozyldy. Abyroı bolǵanda, jasóspirim qarly boranda jaıaýlatyp otyryp aýyldan 50 shaqyrym qashyqta jatqan Shemınov eldi mekeniniń ústinen túsken.
– Boran kúsheıip ketkendikten qaıtar joldy taba almaı qaldym, adasyp júrip 23:30-da Shemınov aýylyna kirdim. Birinshi turǵan úıge kirip, sol úıde jylynyp, jan shaqyrdym, – dedi K.Dýkart.
Jasóspirim osy úıden anasyna qońyraý shalyp, aman-esen ekenin habarlaǵan. Odan keıin kelgen eriktiler jasaǵy Kırıldi úıine deıin jetkizip, ata-anasynyń qolyna tabys etken. Sol kúni kezekshilik etken medısına qyzmetkerleriniń sózinshe, jasóspirimniń qol-aıaǵyn úsik shalmaǵan.
Qostanaı oblysy