Prezıdent Qasym-Jomart Toqaevtyń tóraǵalyǵymen beınebaılanys rejıminde shuǵyl áreket etý shtabynyń kezekti otyrysy ótti. Jıyn barysynda Bas prokýror, Ulttyq qaýipsizdik komıtetiniń tóraǵasy, Ishki ister jáne Qorǵanys mınıstrleriniń mindetin atqarýshy tulǵalar baıandama jasady, dep jazady Egemen.kz Aqordaǵa silteme jasap.
Bas prokýror Qasym-Jomart Toqaevqa tótenshe jaǵdaı rejımin buzǵan 2161 adamnyń ákimshilik jaýapkershilikke tartylǵany týraly málimet berdi. Onyń aıtýynsha, lańkestikke qarsy is-qımyldar bastalǵan kúnnen bastap elimizde 412 qylmystyq is, sonyń ishinde terrorlyq aktiler men kisi óltirý boıynsha sotqa deıingi tergeý amaldary bastalǵan. Prokýratýra organdary Básekelestikti qorǵaý jáne damytý agenttigimen birlesip, suıytylǵan gaz óndiretin sýbektilerdiń baǵa boıynsha ymyralasý derekterin tekserýdi jalǵastyryp jatyr.
Ishki ister mınıstrligi tarapynan Prezıdentke Almaty qalasynda, Almaty, Jambyl, Qyzylorda jáne basqa da oblystarda terrorıstik toptardy joıý men qylmyskerlerdi ustaý boıynsha arnaıy operasııany jalǵastyrý týraly esep berildi. Kisi óltirý, bılik ókilderine qatysty zorlyq-zombylyq, buzaqylyq, memlekettik organdardyń ǵımarattaryna shabýyl jasaý faktileri boıynsha barlyǵy 388 qylmystyq is qozǵaldy. Dáleldemeler bazasyn jınaý jáne tirkeý, oqıǵalar hronologııasyn qalpyna keltirý boıynsha jedel is-sharalar júrgizilip jatqany aıtyldy.
Qarýly Kúshter terrorızmge qarsy operasııany júrgizýde UQK men IIM-ge kómek kórsetip jatyr. О́tken táýlikte 11 eldi mekendegi blokbeketterde áskerı qyzmetshiler 38 adamdy ustady. Olardyń 23-inen atys jáne sýyq qarýlar tabyldy. UQK Shekara qyzmetimen birlesip, áskerı avıasııanyń qoldaýymen taýly jerlerde barlaý-izdestirý is-qımyldary júrgizilýde. Áskerı qyzmetshilerdiń jumysy 25 eldi mekendegi 105 blokbekette jalǵasyp jatyr.
Ulttyq qaýipsizdik komıtetiniń málimetine qaraǵanda elimizdegi jaǵdaı turaqtalyp keledi. Asa qaýipti destrýktıvti is-qımyl tirkelgen joq. «Kıbershıt» júıesi shtattyq rejımde jumys istep tur.
Jıyn sońynda Prezıdent qoǵamdyq tártip pen eldegi qaýipsizdikti qalpyna keltirýdi qarqyndy jalǵastyrýdy tapsyrdy.