«Astana Opera» memlekettik opera jáne balet teatrynda aldaǵy ýaqytta kórermenge usynylatyn birneshe jańa qoıylymǵa daıyndyq jumystary júrip jatyr.
Máselen, Irjı Kılıannyń «Alty bı» baleti jáne óziniń óte jeńil salmaǵyna qaramastan, úlken alyptardy jeńip, alaıaq túlkiden qýlyǵyn asyryp, tutqyndardy bosatatyn Qańbaq shal oqıǵalary týraly Jolan Dástenovtiń «Qańbaq shal» balalar operasy daıyndalýda.
Budan bólek horeograf Raımondo Rebektiń qoıylymynda Sergeı Prokofevtiń «Kúlbıkesh» baleti men Djoakıno Rossınıdiń «Aljırdegi ıtalııalyq qyz» atty operasy da josparlanyp otyr. Al eń bastysy, teatrsúıer jandar úshin basty syılyq – Evgenıı Brýsılovskııdiń «Er Tarǵyn» ulttyq operasy ekenin aıta keteıik. Atalǵan jańa týyndylar naýryz-sáýir aılarynda usynylady.