Qurlyqtyq hokkeı lıgasynda (QHL) óner kórsetip jatqan elordanyń «Barysy» kezekti týr oıynyn syrt aıdynda búkil lıganyń lıderi – Magnıtogorskiniń «Metallýrgimen» ótkizdi.
Osydan bir apta buryn eki ujym «Barys Arenada» kezdesip, jerlesterimiz 3:2 esebimen jeńiske jetken bolatyn. Syrt aıdyndaǵy qarymta matchta da qazaqstandyq komandanyń baǵy jandy. Oıyn barysynda «Barys» úsh márte esepte alǵa shyǵyp alǵanymen, aıdyn ıeleri kóp uzamaı tarazy basyn teńestirip otyrdy. Sóıtip, matchtyń negizgi ýaqyty 3:3 esebimen teń aıaqtalyp, kezdesý overtaımǵa ulasty. Qosymsha mınýtta Lınden Veı mergendigimen kózge túsip, «Barysqa» jeńis syılady. Aıta keteıik, oıynnyń negizgi kezeńinde Álıhan Ásetov, Iаkob Lılıa jáne Anton Sagadeev dáldik tanytqan edi.
Matchtan keıin bas bapker Iýrıı Mıhaılıs bul jeńisti barsha qazaqstandyq jankúıerge arnaıtynyn jetkizdi. Taǵy bir aıta keterligi, keshegi kezdesýde «Barystyń» qaqpasyn kúzetken Andreı Shýtov QHL-daǵy alǵashqy oıynyn ótkizip, 37 seıv jasady.