Qarjy polısııasy uıymdasqan qylmystyq topqa kómek kórsetip kelgen respýblıka aımaqtaryndaǵy salyq organdarynyń 18 qyzmetkerin anyqtady. Bul týraly Mail.ru habarlady.
18 aqpanda Qarjy mınıstrliginiń Salyq komıteti taýarlardy ımporttaý kezindegi qosymsha qun salyǵyn ákimshildendirý basqarmasynyń bastyǵy Bulǵynov quqyq qorǵaý qyzmetkerleriniń qolyna túsip, sot sanksııasymen qamaýǵa alyndy.
Bulǵynov 2009-2010 jyldar aralyǵynda Qostanaı oblystyq salyq departamentiniń bastyǵy bolǵan tusta qyzmet babyn teris paıdalanǵan. Naqty aıtqanda, jalǵan kásiporyndarǵa tekserý júrgizip, olardyń esep-shottaryna zańsyz túrde artyq tólengen qosymsha qun salyǵynyń túsýine sebepker bolǵan. Sondaı-aq, 2010-2012 jyldary Ońtústik Qazaqstan oblystyq salyq departamentiniń bastyǵy bolǵan J. Núsipov te qylmystyq toptyń jalǵan kásiporyndaryn tekserýge qatysy bolǵan eken. Munan ózge, belgili bir qylmys túri boıynsha Aqmola, Jambyl jáne Qostanaı oblystaryndaǵy salyq organdarynyń 16 qyzmetkeri jaýapqa tartyldy.
Eske sala keteıik, ótken jyldyń qyrkúıek aıynda Qarjy polısııasy agenttiginiń qyzmetkerleri Artýr Kım men Farhad Qalıevti qamaýǵa aldy. Olar jalǵan kásiporyndary arqyly ózge kommersııalyq uıymdardyń salyq tóleýden jaltarýyna yqpal jasaǵan kórinedi. Sonyń saldarynan memleketke 2,3 mlrd. teńgeden asa shyǵyn kelgen. Jalpy, ótken jyly salyq organdarynyń 49 qyzmetkeri qylmystyq jaýapkershilikke tartylypty.
Ámirhan Almaǵanbetov.
Derekkóz: Mail.ru.
Foto: Mirvam.org.