Elimizdiń ár óńirinde suıytylǵan gaz baǵasy tómendedi. Bul atyraýlyq kólik júrgizýshilerin de qýantyp otyr. Oblystyq energetıka jáne turǵyn úı-kommýnaldyq sharýashylyq basqarmasynyń basshysy Erlan Nazarovtyń málimetine súıensek, oblysta 89 gaz quıý stansasy bar.
– Prezıdent tapsyrmasyna sáıkes, Atyraý oblysynda suıytylǵan gaz baǵasy tómendedi. Máselen, Atyraý qalasy men Mahambet, Inder, Isataı, Maqat aýdandarynda suıytylǵan gaz 50 teńgeden satylyp jatyr. Al oblys ortalyǵynan 200 shaqyrymnan asatyn qashyqta ornalasqan Jylyoı, Qurmanǵazy, Qyzylqoǵa aýdandaryndaǵy baǵa – 55 teńge. Qazir óńirde kólikterge suıytylǵan gaz quıatyn 89 stansa bar. Onyń ishinde 51 stansa Atyraý qalasynda, al qalǵany aýdandarda ornalasqan. Oblysta suıytylǵan gazdyń qory jetkilikti deýge bolady. О́ıtkeni óńirde 2 700 tonna suıytylǵan gaz bar, – deıdi E.Nazarov.
Al oblystyq aýyl sharýashylyǵy basqarmasynyń basshysy Amangeldi Salamattyń aıtýynsha, áleýmettik nan jáne birinshi surypty un baǵasyn turaqtandyrý maqsatynda úsh jaqty memorandým jasaqtalypty. Soǵan sáıkes, óńirde 13 myń tonna bıdaı jetkizý josparlanyp otyr.
– Azyq-túlik ónimderi aınalym tizbesi arqyly alynady. Sondaı azyq-túlik ónimderi «Ideal», «Lıder» sýpermarketteriniń 36 jelisinde, kókónis ónimderi «Dına», «Nasıha», «Kóktem», «Saraıshyq» saýda oryndarynda satylyp jatyr. Qazir óńirde áleýmettik mańyzy bar azyq-túlik ónimderiniń 9 myń tonna qory jasaqtaldy. Turaqtandyrý qorynda 579,6 tonna kartop, 325,8 tonna sábiz, 339 tonna pııaz, 200 tonna qyryqqabat saqtaýly tur. Úshjaqty memorandýmǵa sáıkes, áleýmettik nan baǵasy – 90, al birinshi surypty un 145 teńgeden satylady, – dep málim etti Amangeldi Salamat.